ວັນທີ 30 ເມສາຜ່ານມາ, ທ່ານອາບັສ ປະທານາທິບໍດີປາເລັສຕິນກ່າວຢ້ຳວ່າ, ຝ່າຍປາເລັສຕິນບໍ່ຮັບເອົາອາເມລິກາເປັນຜູ້ໄກ່ເກ່ຍແຕ່ຝ່າຍດຽວໃນຂະບວນການສັນຕິພາບປາເລັສຕິນ-ອິສຣາແອນ.
ໃນພິທີເປີດກອງປະຊຸມຄະນະກຳມະການແຫ່ງຊາດປາເລັສຕິນທີ່ຈັດຂຶ້ນຢູ່ຣາມາລາ ທີ່ຢູ່ຝັ່ງຕາເວັນຕົກຂອງແມ່ນ້ຳຈໍແດນໃນວັນທີ 30 ເມສາຜ່ານມາ, ທ່ານອາບັສກ່າວວ່າ, ປາເລັສຕິນຈະບໍ່ຮັບເອົາອັນທີ່ວ່າ "ສັນຍາສະຕະວັດ"ກ່ຽວກັບຂະບວນການສັນຕິພາບເຂດຕາເວັນອອກກາງທີ່ສະເໜີໂດຍອາເມລິກາ, ເພາະມັນໄດ້ປັດເຂ່ຍບັນຫາເຢຣູສະເລັມ, ບັນຫາຊາວອົບພະຍົບປາເລັສຕິນ ແລະບັນຫາຈຸດຕັ້ງຖິ່ນຖານຊາວຢິວຢູ່ນອກການເຈລະຈາ.
ທ່ານອາເບັສກ່າວຕື່ມວ່າ, ຖ້າອາເມລິກາຢາກເຮັດແທ້ທຳຈິງ, ກໍຕ້ອງສະໜັບສະໜູນ "ແຜນການສອງປະເທດ", ໂດຍສະໜັບສະໜູນເຢຣູສະເລັມຕາເວັນອອກເປັນນະຄອນຫຼວງຂອງປະເທດປາເລັສຕິນທີ່ເປັນເອກະລາດ.
ວັນທີ 6 ທັນວາ ປີ2017, ທ່ານໂດນັນ ທຣຳ, ປະທານາທິບໍດີອາເມລິກາໄດ້ປະກາດວ່າ ອາເມລິກາຮັບຮອງເຢຣູສະເລັມເປັນນະຄອນຫຼວງຂອງອິສຣາແອນ, ເຮັດໃຫ້ຝ່າຍປາເລັສຕິນບໍ່ພໍໃຈຢ່າງຮຸນແຮງ. ຝ່າຍປາເລັສຕິນເຄີຍກ່າວຫຼາຍເທື່ອວ່າບໍ່ຍອມໃຫ້ອາເມລິກາເປັນຜູ້ໄກ່ເກ່ຍແຕ່ຝ່າຍດຽວໃນຂະບວນການສັນຕິພາບປາເລັສຕິນ-ອິສຣາແອນ.
 |
