ວັນທີ 1 ພຶດສະພານີ້, ທ່ານຫຼີຊຽນໂລງ, ນາຍົກລັດຖະມົນຕີສິງກະໂປກ່າວວ່າ, ຄາດວ່າປີນີ້ຈັງຫວະເຕີບໂຕດ້ານເສດຖະກິດຂອງສິງກະໂປຈະຢູ່ໃນລະຫວ່າງ 1,5 – 3,5%, ຖ້າວຽກງານດ້ານຕ່າງໆດຳເນີນໄປຢ່າງສະດວກ, ຈັງຫວະເຕີບໂຕອາດຈະສູງກວ່າ 2,5%.
ທ່ານຫຼີຊຽນໂລງກ່າວວ່າ, ປີກາຍນີ້, ເສດຖະກິດສິງກະໂປໄດ້ມີການເຕີບໂຕສູງກວ່າການຄາດໝາຍ, ໂດຍບັນລຸ 3,6%, ເຊິ່ງສູງກວ່າ 1%-2%ທີ່ຄາດໝາຍໄວ້. ພ້ອມກັນນັ້ນ, ສິງກະໂປຍັງໄດ້ຮັບຜົນງານທີ່ດີໃນດ້ານການສ້າງຕຳແໜ່ງປະກອບອາຊີບ ແລະອື່ນໆ, ຈັງຫວະເຕີບໂຕຂອງກຳລັງການຜະລິດບັນລຸເຖິງລະດັບສູງສຸດໃນຮອບ 7 ປີທີ່ຜ່ານມາ.
ແຕ່ທ່ານກ່າວຕື່ມວ່າ, ເສດຖະກິດສິງກະໂປອາໄສສະພາບແວດລ້ອມພາຍນອກຫຼາຍສົມຄວນ, ອາເມລິກາລະເມີດລະບຽບການຂອງອົງການການຄ້າໂລກ, ແລະເກັບພາສີແຕ່ຝ່າຍດຽວໄດ້ພາໃຫ້ເກີດຄວາມຂັດແຍ່ງກັນດ້ານການຄ້າລະຫວ່າງຈີນກັບອາເມລິກາ, ອັນໄດ້ສົ່ງຜົນກະທົບຕໍ່ການພັດທະນາເສດຖະກິດຂອງສິງກະໂປໃນອະນາຄົດ.
 |
