ວັນທີ 30 ເມສາທີ່ຜ່ານມາ ທຳນຽບຂາວອາເມລິກາປະກາດວ່າ, ມື້ດຽວກັນ ທ່ານໂດນັນ ທຣຳ ປະທານາທິບໍດີອາເມລິກາໄດ້ຕົກລົງເລື່ອນເວລາເກັບພາສີນຳເຂົ້າຜະລິດຕະພັນເຫຼັກກ້າແລະອາລຸຍມີໂຍມຕໍ່ອົງກອນເສດຖະກິດຂອງການາດາ ແມັກຊິກແລະສະຫະພາບເອີລົບເປັນຕົ້ນ.
ມື້ດຽວກັນ ທ່ານທຣຳໄດ້ກ່າວໃນຖະແຫຼງການສະບັບໜຶ່ງວ່າ, ປັດຈຸບັນ ອາເມລິກາໄດ້ຮ່ວມກັບສ.ເກົາຫຼີກ້າວເຖິງຂັ້ນເຊັນສັນຍາສະບັບສຸດທ້າຍກ່ຽວກັບການນຳເຂົ້າຜະລິດຕະພັນເຫຼັກກ້າ ແລະກໍໄດ້ກ້າວເຖິງຂັ້ນເຊັນສັນຍາດ້ານຫຼັກການໃນການນຳເຂົ້າຜະລິດຕະພັນເຫຼັກກ້າແລະອາລຸຍມີໂຍມກັບອາຊັງຕິນ ອົສຕຼາລີແລະເບຼຊິນ, ເນື້ອໃນສັນຍາຈະປະກາດອອກໃນໄລຍະມໍ່ໆນີ້. ນອກນີ້, ອາເມລິກາຈະສືບຕໍ່ເຈລະຈາກັບການາດາ ແມັກຊິກແລະສະຫະພາບເອີລົບກ່ຽວກັບບັນຫາດັ່ງກ່າວ, ແລະເລື່ອນເວລາຍົກເວັ້ນເປັນເວລາ 30 ວັນ. ຖະແຫຼງການກ່າວວ່າ, ການເລື່ອນເວລາເທື່ອນີ້ຈະເປັນຄັ້ງສຸດທ້າຍທີ່ອາເມລິກາຈັດໃຫ້ອົງກອນເສດຖະກິດ 3 ແຫ່ງດັ່ງກ່າວ.
ກ່ອນໜ້ານີ້ ສະຫະພາບເອີລົບໄດ້ກ່າວວ່າ, ຖ້າບໍ່ໄດ້ຮັບສິດຍົກເວັ້ນຕື່ມອີກ, ສະຫະພາບເອີລົບຈະໃຊ້ມາດຕະການຕ້ານການລົງໂທດຕໍ່ຜະລິດຕະພັນເຫຼັກກ້າແລະອາລຸຍມີໂຍມຂອງອາເມລິກາ.
 |
