ການຄ້າຂາອອກຕໍ່ຈີນຂອງອາເມລິກາໄດ້ສ້າງຕຳແໜ່ງປະກອບອາຊີບໃຫ້ອາເມລິການັບເປັນລ້ານຕຳແໜ່ງ

ວັນທີ 30 ເມສາທີ່ຜ່ານມາ, ຄະນະກຳມະການທົ່ວປະເທດຂອງການຄ້າອາເມລິກາ-ຈີນໄດ້ປະກາດບົດລາຍງານປະຈຳປີ ໂດຍສະແດງໃຫ້ເຫັນວ່າ, ການຄ້າຕໍ່ຈີນຂອງອາເມລິກາໃນປີ 2017 ໄດ້ມີການເພີ່ມຂຶ້ນຢ່າງໃຫຍ່ ພາຍຫຼັງໄດ້ຕົກຕ່ຳລົງເປັນເວລາ 2 ປີລຽນຕິດ, ອັນໄດ້ສ້າງຕຳແໜ່ງການປະກອບອາຊີບໃຫ້ແກ່ອາເມລິການັບເປັນ 1 ລ້ານຕຳແໜ່ງ.

ບົດລາຍງານດັ່ງກ່າວສະແດງໃຫ້ເຫັນວ່າ, ປັດຈຸບັນ ປະເທດຈີນໄດ້ກາຍເປັນຈຸດໝາຍປາຍທາງໃຫຍ່ອັນດັບ 3 ຂອງອາເມລິກາໃນການສົ່ງອອກສິນຄ້າ ແລະການບໍລິການ. ແຕ່ປີ 2008-2017 ການຄ້າສິນຄ້າອາເມລິກາຕໍ່ຈີນໄດ້ເພີ່ມຂຶ້ນ 86%, ສ່ວນໃນໄລຍະດຽວກັນນີ້ ການຄ້າສິນຄ້າຕໍ່ປະເທດແລະເຂດແຄວ້ນອື່ນໆໃນໂລກຂອງອາເມລິການັ້ນພຽງແຕ່ເພີ່ມຂຶ້ນ 21% ທໍ່ນັ້ນ. ແຕ່ປີ 2007-2016 ການຄ້າດ້ານການບໍລິການຕໍ່ຈີນຂອງອາເມລິກາໄດ້ເພີ່ມຂຶ້ນຫຼາຍກວ່າ 3 ເທົ່າ, ໃນໄລຍະດຽວກັນ ການຄ້າດ້ານການບໍລິການທີ່ອາເມລິກາສົ່ງອອກຂາຍຢູ່ປະເທດແລະເຂດແຄວ້ນອື່ນໆໃນໂລກພຽງແຕ່ເພີ່ມຂຶ້ນ 50% ທໍ່ນັ້ນ.

ບົດລາຍງານຍັງສະແດງໃຫ້ເຫັນວ່າ, ການຄ້າຂາອອກຕໍ່ຈີນຂອງອາເມລິກາໄດ້ສົ່ງຜົນປະໂຫຍດໄປສູ່ທັງໝົດລັດຂອງອາເມລິກາ. ແຕ່ປີ 2008-2017, 49 ລັດຂອງອາເມລິກາໄດ້ມີການຄ້າສິນຄ້າທີ່ສົ່ງອອກຂາຍຢູ່ຈີນນັ້ນເພີ່ມຂຶ້ນຢ່າງເດັ່ນຊັດ, ໃນນັ້ນ 17 ລັດບັນລຸການເພີ່ມຂຶ້ນຫຼາຍກວ່າ 100%. ປີ 2007-2016 ການຄ້າດ້ານບໍລິການຕໍ່ຈີນຂອງໝົດທຸກລັດອາເມລິກາລ້ວນແຕ່ເພີ່ມຂຶ້ນ 100% ຂຶ້ນໄປ, ໃນນັ້ນ ມີ 31 ລັດໄດ້ເພີ່ມຂຶ້ນ ຫຼາຍກວ່າ 300% .