ວັນທີ 1 ພຶດສະພານີ້, ສະຫະພາບເອີຣົບໄດ້ອອກຖະແຫຼງການວ່າ, ຂໍ້ຕົກລົງທີ່ອາເມລິກາຈະແກ່ຍາວອາຍຸການຍົກເວັ້ນພາສີຂອງຜະລິດຕະພັນເຫຼັກກ້າແລະອາລູມີນຽມຕໍ່ສະຫະພາບເອີຣົບເປັນໄລຍະສັ້ນນັ້ນໄດ້ເຮັດໃຫ້ຕະຫຼາດມີຄວາມບໍ່ແນ່ນອນຫຼາຍຂຶ້ນ, ພ້ອມທັງໄດ້ກະທົບຕໍ່ນະໂຍບາຍການຄ້າ; ການເຈລະຈາລະຫວ່າງສອງຝ່າຍຈະສືບຕໍ່ດຳເນີນໄປໜ້າ ແຕ່ສະຫະພາບເອີຣົບຈະບໍ່ດຳເນີນການເຈລະຈາກັບອາເມລິກາພາຍໃຕ້ສະພາບການຂົ່ມຂູ່.
ວັນທີ 30 ເມສາຜ່ານມາ, ທຳນຽບຂາວອາເມລິກາໄດ້ເປີດເຜີຍແຈ້ງການປະທານາທິບໍດີວ່າ, ອາເມລິກາຈະສືບຕໍ່ຍົກເວັ້ນພາສີຂອງຜະລິດຕະພັນເຫຼັກກ້າແລະອາລູມີນຽມຕໍ່ສະຫະພາບເອີຣົບ,ການາດາແລະແມັກຊິກຈົນຮອດວັນທີ 1 ມິຖຸນາໜ້ານີ້,ເພື່ອເຍື້ອເວລາຄັ້ງສຸດທ້າຍໃຫ້ແກ່ການເຈລະຈາທີ່ກ່ຽວຂ້ອງອີກ 30 ວັນ.
ຖະແຫຼງການຂອງສະຫະພາບເອີຣົບລະບຸວ່າ, ຄວນຍົກເວັ້ນພາສີຂອງຜະລິດຕະພັນເຫຼັກກ້າແລະອາລູມີນຽມຕໍ່ສະຫະພາບເອີຣົບຢ່າງເຖິງຖອງແລະຖາວອນ, ອາເມລິກາຂຶ້ນພາສີໃນຂໍ້ອ້າງຄວາມໝັ້ນຄົງແຫ່ງຊາດແມ່ນບໍ່ມີບ່ອນອ້າງອີງໃດໆ.
ຂໍ້ຕົກລົງຂອງລັດຖະບານໂດນັນ ທຣຳທີ່ຂຶ້ນພາສີຜະລິດຕະພັນເຫຼັກກ້າແລະອາລູມີນຽມໄດ້ຖືກຄັດຄ້ານຢ່າງຮຸນແຮງຈາກປະຊາຄົມໂລກ. ຄູ່ການຄ້າຈຳນວນໜຶ່ງຂອງອາເມລິກາສະແດງຄວາມເປັນຫ່ວງ ແລະໄດ້ກ່າວເຕືອນວ່າມາດຕະການນີ້ຂອງອາເມລິກາບໍ່ພຽງແຕ່ອາດຈະກະທົບຕໍ່ຜົນປະໂຫຍດດ້ານການຄ້າຂອງຫຼາຍຝ່າຍເທົ່ານັ້ນ, ແຕ່ຍັງເປັນໄພຂົ່ມຂູ່ຕໍ່ຄວາມໝັ້ນທ່ຽງຂອງໂຄງປະກອບການຄ້າຫຼາຍຝ່າຍບົນພື້ນຖານລະບຽບການອີກດ້ວຍ.
 |
