ໃນການໂຮມຊຸມນຸມວັນກຳມະກອນສາກົນທີ່ຈັດຂຶ້ນໃນວັນທີ 1 ພຶດສະພານີ້ ທ່ານ ລີຊຽນລົງ ນາຍົກລັດຖະມົນຕີສິງກະໂປກ່າວວ່າ, ຄາດວ່າການເຕີບໂຕຂອງເສດຖະກິດສິງກະໂປໃນປີນີ້ຈະເພີ່ມຂຶ້ນຢູ່ລະຫວ່າງ 1,5% ເຖິງ 3,5%, ແລະອາດຈະຫຼາຍກວ່າ 2,5% ພາຍໃຕ້ສະພາບທີ່ວຽກງານທຸກດ້ານດຳເນີນໄປດ້ວຍດີ.
ທ່ານ ລີຊຽນລົງ ກ່າວວ່າ, ປີ 2017 ເສດຖະກິດສິງກະໂປໄດ້ຮັບການເຕີບໂຕເກີນຄາດໝາຍ, ເພີ່ມຂຶ້ນຮອດ 3,6%, ສູງກວ່າການຄາດຄະເນໃນເມື່ອກ່ອນ 1% ຫາ 2%. ຂະນະດຽວກັນ, ສິງກະໂປໄດ້ຮັບຜົນສຳເລັດທີ່ດີກວ່າເກົ່າໃນຫຼາຍດ້ານເຊັ່ນ: ການສ້າງວຽກເຮັດງານທຳເປັນຕົ້ນ, ຈັງຫວະການເຕີບໂຕຂອງກຳລັງການຜະລິດໄດ້ເພີ່ມຂຶ້ນຮອດລະດັບສູງສຸດໃນໄລຍະ 7 ປີຜ່ານມາ.
ແຕ່ທ່ານກ່າວວ່າ, ເສດຖະກິດສິງກະໂປອີງອາໄສຕໍ່ສະພາບແວດລ້ອມພາຍນອກໃນລະດັບສູງ, ການທີ່ອາເມລິກາລະເມີດລະບຽບການອົງການການຄ້າໂລກ ແລະ ຂຶ້ນພາສີພຽງຝ່າຍດຽວໄດ້ເຮັດໃຫ້ເກີດຄວາມຂັດແຍ້ງກັນດ້ານການຄ້າລະຫວ່າງຈີນ-ອາເມລິກາ ຍ່ອມເປັນສ່ວນໜຶ່ງທີ່ຈະສ້າງເງົາມືດຕໍ່ອະນາຄົດຂອງເສດຖະກິດສິງກະໂປໃນຕໍ່ໜ້າ.
 |
