ໂຄສົກອົງການສະຫະປະຊາຊາດໄດ້ຖະແຫຼງໃນວັນທີ 1 ພຶດສະພານີ້ວ່າ, ທ່ານ ມູນແຈອິນ ປະທານາທິບໍດີ ສ.ເກົາຫຼີ ໄດ້ສະແຫວງຫາການສະໜັບສະໜູນຈາກອົງການສະຫະປະຊາຊາດກ່ຽວກັບການກວດສອບການປິດເຂດທົດລອງນິວເຄລຍຂອງ ສປປ ເກົາຫຼີ.
ຕາມຂ່າວຈາກໂຄສົກອົງການສະຫະປະຊາຊາດເປີດເຜີຍໃຫ້ສື່ມວນຊົນຮູ້ໃນມື້ດັ່ງກ່າວວ່າ, ທ່ານ ອານໂຕນີໂອ ກູເຕີເຣສ ເລຂາທິການໃຫຍ່ອົງການສະຫະປະຊາຊາດໄດ້ສົນທະນາທາງໂທລະສັບກັບທ່ານ ມູນແຈອິນ ປະທານາທິບໍດີ ສ.ເກົາຫຼີ ໃນວັນທີ 30 ເມສາຜ່ານມາ. ໃນການສົນທະນາ, ທ່ານ ມູນແຈອິນ ໄດ້ຮ້ອງຂໍໃຫ້ອົງການສະຫະປະຊາຊາດໃຫ້ການສະໜັບສະໜູນແກ່ການກວດສອບການປິດເຂດທົດລອງນິວເຄລຍຂອງ ສປປ ເກົາຫຼີ, ແລະໄດ້ຮ້ອງຂໍໃຫ້ອົງການສະຫະປະຊາຊາດສະໜັບສະໜູນການປະຕິບັດສັນຍາສອງຝ່າຍລະຫວ່າງ ສ.ເກົາຫຼີ - ສປປ ເກົາຫຼີ ໂດຍປ່ຽນເຂດປອດທະຫານລະຫວ່າງສອງປະເທດເປັນເຂດສັນຕິພາບ.
ໃນການສົນທະນາ, ທ່ານ ກູເຕີເຣສ ໄດ້ສະແດງຄວາມຊົມເຊີຍຕໍ່ທ່ານ ມູນແຈອິນ ກ່ຽວກັບການຈັດການພົບປະລະຫວ່າງຜູ້ນຳ ສ.ເກົາຫຼີ - ສປປ ເກົາຫຼີ ຢ່າງສຳເລັດຜົນ ພ້ອມທັງກ່າວຢ້ຳອົງການສະຫະປະຊາຊາດຈະພະຍາຍາມສຸດຂີດ ເພື່ອສະໜັບສະໜູນການຊຸກຍູ້ການສົນທະນາລະຫວ່າງສອງຝ່າຍ.
 |
