ທ່ານນາງຮວ້າຊຸ່ນຢິງ ໂຄສົກກະຊວງການຕ່າງປະເທດຈີນ ກ່າວໃນວັນທີ 2 ພຶດສະພານີ້ວ່າ: ການພົບປະບໍ່ເປັນທາງການລະຫວ່າງຜູ້ນຳຈີນແລະອິນເດຍ ໄດ້ຮັດແໜ້ນມິດຕະພາບ ແລະ ສ້າງຄວາມໄວ້ເນື້ອເຊື່ອໃຈກັນຕື່ມໃຫ້ແກ່ຜູ້ນຳສອງປະເທດ, ເປັນການສ້າງຮູບແບບໃໝ່ແຫ່ງການໄປມາຫາສູ່ແລກປ່ຽນກັນລະຫວ່າງຜູ້ນຳຈີນ-ອິນເດຍ ແລະເປັນການເປີດໜ້າໃໝ່ແຫ່ງການພົວພັນລະຫວ່າງສອງປະເທດ ທັງມີບົດບາດທີ່ຕັ້ງໜ້າຕໍ່ຄວາມໝັ້ນທ່ຽງແລະການພັດທະນາຂອງພາກພື້ນ ກໍຄືຂອງໂລກ.
ທັງນີ້ ໃນກອງປະຊຸມຖະແຫຼງຂ່າວທີ່ຈັດຂຶ້ນໃນວັນດັ່ງກ່າວ, ທ່ານນາງຮວ້າຊຸ່ນຢິງ ໄດ້ຕອບຄຳຖາມຂອງນັກຂ່າວ ໂດຍກ່າວວ່າ: ແຕ່ວັນທີ 27-28 ເມສາຜ່ານມາ, ທ່ານສີຈິ້ນຜິງ ປະທານປະເທດຈີນ ແລະ ທ່ານນາຣັນດຣາ ໂມດີ ນາຍົກລັດຖະມົນຕີອິນເດຍ ໄດ້ພົບປະບໍ່ເປັນທາງການຢູ່ນະຄອນອູຮັ້ນ ເທດສະບານແຂວງຫູເປີຍ ສປ ຈີນ ໂດຍຜູ້ນຳສອງທ່ານໄດ້ແລກປ່ຽນກັນຢ່າງຈິງໃຈໃນທ່າມກາງບັນຍາກາດທີ່ມີໄມຕີຈິດມິດຕະພາບ ແລະໄດ້ແລກປ່ຽນຄວາມເຫັນຢ່າງເຕັມສ່ວນກ່ຽວກັບສະຖານະການສາກົນ, ການພົວພັນລະຫວ່າງສອງປະເທດ, ການຮ່ວມມືໃນບັນດາຂົງເຂດລະຫວ່າງສອງຝ່າຍ ແລະອື່ນໆ ແລະສາມາດບັນລຸຂໍ້ຕົກລົງທີ່ສຳຄັນ. ຜູ້ນຳສອງທ່ານ ໄດ້ຮັບຮູ້ທ່າອ່ຽງສະຖານະການໃຫຍ່ຂອງໂລກ ແລະຕຳແໜ່ງທາງປະຫວັດສາດຂອງຈີນແລະອິນເດຍໃນປັດຈຸບັນຢ່າງຈະແຈ້ງຕື່ມອີກ, ໄດ້ກຳນົດຫຼັກການຊີ້ນຳທີ່ສຳຄັນໃນການພັດທະນາການພົວພັນລະຫວ່າງສອງປະເທດຕື່ມອີກ ແລະ ໄດ້ວາດມະໂນພາບແຜນການທີ່ຍິ່ງໃຫຍ່ແຫ່ງການຮ່ວມມືຮອບດ້ານລະຫວ່າງສອງປະເທດຕື່ມອີກ. ທ່ານນາງຮວ້າຊຸ່ນຢິງ ກ່າວຕື່ມວ່າ: ຈີນຍິນດີຮ່ວມກັບອິນເດຍ ເລັ່ງຈັດຕັ້ງປະຕິບັດຕາມຄວາມຮັບຮູ້ທີ່ເປັນເອກະພາບທີ່ສຳຄັນລະຫວ່າງຜູ້ນຳສອງປະເທດ ແລະຖືເອົາການພົບປະຂອງຜູ້ນຳສອງປະເທດເທື່ອນີ້ເປັນໂອກາດ ເພື່ອສ້າງສະຖານະການໃໝ່ແຫ່ງການຮ່ວມມືແບບຕ່າງຝ່າຍຕ່າງມີຜົນປະໂຫຍດໃນຂົງເຂດຕ່າງໆລະຫວ່າງຈີນ-ອິນເດຍ.
