ວັນທີ 2 ພຶດສະພານີ້, ທ່ານ ໄມ້ຄ໌ ປອມແປວ ລັດຖະມົນຕີກະຊວງການຕ່າງປະເທດອາເມລິກາຜູ້ໃໝ່ໄດ້ກ່າວໃນພິທີສາບານຕົວຂຶ້ນຮັບຕຳແໜ່ງຢ່າງເປັນທາງການວ່າ, ອາເມລິກາຈະປະຕິບັດ "ນະໂຍບາຍການຕ່າງປະເທດທີ່ເຂັ້ມແຂງ" ເມື່ອມີຄວາມຈຳເປັນ, ເພື່ອປົກປັກຮັກສາຜົນປະໂຫຍດຂອງອາເມລິກາເປັນບູລິມະສິດ.
ໃນມື້ດັ່ງກ່າວ, ທ່ານ ໄມ້ຄ໌ ປອມແປວ ໄດ້ສາບານຕົວຂຶ້ນຮັບຕຳແໜ່ງລັດຖະມົນຕີກະຊວງການຕ່າງປະເທດອາເມລິກາສະໄໝທີ 70 ຢ່າງເປັນທາງການ. ທ່ານໄດ້ກ່າວປາໄສວ່າ, ປັດຈຸບັນ, ຄວາມໝັ້ນຄົງ, ຄວາມຈະເລີນຮຸ່ງເຮືອງແລະເສລີພາບຂອງອາເມລິກາໄດ້ປະເຊີນກັບການຂົ່ມຂູ່ຢ່າງຫຼວງຫຼາຍ, ທ່ານຈະນຳພາຄະນະກະຊວງການຕ່າງປະເທດພະຍາຍາມຮັບມືກັບການຂົ່ມຂູ່ເຫຼົ່ານີ້, ເພື່ອຮັບປະກັນໃຫ້ອາເມລິກາເປັນຜູ້ນຳທີ່ໄດ້ຮັບຄວາມເຄົາລົບນັບຖືແລະມີຫຼັກການໂດຍຕະຫຼອດໃນເວທີສາກົນ.
ເມື່ອກ່າວເຖິງບັນຫານິວເຄລຍຂອງແຫຼມເກົາຫຼີ, ທ່ານ ປອມແປວ ກ່າວວ່າ, ປັດຈຸບັນ, ຍັງບໍ່ຮູ້ຜົນສຸດທ້າຍເທື່ອ, ແຕ່ "ປັດຈຸບັນຮອດເວລາແກ້ໄຂບັນຫາດັ່ງກ່າວຢ່າງເຖິງຖອງແລ້ວ".
ທ່ານ ປອມແປວ ກ່າວຕື່ມວ່າ, ອາເມລິກາພວມຮັບມືກັບການກະທຳທີ່ເປັນປໍລະປັກຕ່າງໆຂອງອີຣານ, ຈະທຳການຕັດສິນກ່ຽວກັບສັນຍາວ່າດ້ວຍບັນຫານິວເຄລຍຂອງອີຣານທີ່ມີຄວາມບົກຜ່ອງ.
 |
