ກອງປະຊຸມລັດຖະມົນຕີການເງິນແລະຜູ້ວ່າການທະນາຄານກາງອາຊຽນ-ຈີນ,ຍີ່ປຸ່ນແລະ ສ ເກົາຫຼີ ຫຼືອາຊຽນ+ 3 ຄັ້ງທີ 21 ໄດ້ຈັດຂຶ້ນຢູ່ນະຄອນຫຼວງມານິລາ ປະເທດຟີລິບປິນໃນວັນທີ 4 ພຶດສະພານີ້ໂດຍໄດ້ເນັ້ນໃສ່ຫົວຂໍ້ຕ່າງໆເປັນຕົ້ນ ສະພາບເສດຖະກິດມະຫາພາກຂອງໂລກແລະພາກພື້ນ, ການຮ່ວມມືດ້ານການເງິນໃນພາກພື້ນອາຊຽນ+ 3 ແລະອື່ນໆ ທັງໄດ້ອອກຖະແຫຼງການຮ່ວມ.
ທີ່ປະຊຸມເຫັນວ່າ: ເສດຖະກິດໂລກໄດ້ປາກົດທ່ວງທ່າຟື້ນຕົວຂຶ້ນພ້ອມກັນຢ່າງແຂງແຮງ, ພາກພື້ນອາຊຽນ+ 3 ສືບຕໍ່ຮັກສາຈັງຫວະການເຕີບໂຕຂອງເສດຖະກິດຢ່າງໄວສົມຄວນ, ແຕ່ຍັງຄົງຜະເຊີນກັບຄວາມສ່ຽງຕ່າງໆເປັນຕົ້ນ ລັດທິປົກປ້ອງການຄ້າຟື້ນຕົວຄືນ, ສະພາບການເງິນທົ່ວໂລກຮັດກຸມໄວເກີນຄາດຄະເນແລະອື່ນໆ. ອາຊຽນກັບຈີນ,ຍີ່ປຸ່ນແລະສ ເກົາຫຼີໃຫ້ຄຳໝັ້ນສັນຍາວ່າ ຈະໃຊ້ທຸກມາດຕະການທີ່ຈຳເປັນເຊັ່ນ ນະໂຍບາຍເງິນຕາ,ນະໂຍບາຍການເງິນແລະການປະຕິຮູບໂຄງປະກອບແລະອື່ນໆເພື່ອຊຸກຍູ້ໃຫ້ເສດຖະກິດເຕີບໂຕຢ່າງແຂງແຮງ,ຍືນຍົງ,ດຸນທ່ຽງແລະກວມລວມ. ບັນດາຝ່າຍໄດ້ກ່າວຢ້ຳສະໜັບສະໜູນຂອບການຄ້າຫຼາຍຝ່າຍແລະການລົງທຶນແບບເປີດປະຕູແລະປະຕິບັດຕາມລະບຽບການ, ເດັດດ່ຽວຕໍ່ຕ້ານລັດທິປົກປ້ອງໃນທຸກຮູບແບບ, ລົງເລິກການພົວພັນດ້ານການຄ້າແລະການລົງທຶນໃນພາກພື້ນ, ຊຸກຍູ້ຂະບວນການເສດຖະກິດເຊື່ອມໂຍງເຂົ້າກັນ ແລະການເຊື່ອມຈອດກັນຂອງພາກພື້ນແຫ່ງນີ້. ຂະນະດຽວກັນ, ບັນດາຝ່າຍຍັງຈະສືບຕໍ່ເພີ່ມທະວີການຕິດຕາມການເຄື່ອນໄຫຼຂອງເງິນທຶນ, ເພີ່ມຄວາມເຂັ້ມແຂງຂອງເສດຖະກິດເພື່ອຮັບມືກັບຜົນກະທົບຈາກພາຍນອກຢ່າງເບັງເກີດຜົນ, ປົກປັກຮັກສາຄວາມໝັ້ນທ່ຽງດ້ານເສດຖະກິດແລະການເງິນຂອງພາກພື້ນ.
ໂອກາດປະກອບຄຳຄິດເຫັນໃນກອງປະຊຸມ, ທ່ານຢວີເວີ້ຍຜິງ ຮອງລັດຖະມົນຕີກະຊວງການເງິນຈີນກ່າວວ່າ: ເສດຖະກິດໂລກໃນປັດຈຸບັນໄດ້ຮັກສາທ່ວງທ່າຟື້ນຕົວຄືນ, ແຕ່ກໍບໍ່ຄວນປະໝາດຄວາມສ່ຽງຕ່າງໆເປັນຕົ້ນລັດທິປົກປ້ອງການຄ້າຟື້ນຕົວຄືນ,ຄວາມຂັດແຍ້ງດ້ານການຄ້າຮຸນແຮງຂຶ້ນຕື່ມກໍຄືສິ່ງທ້າທາຍດ້ານໂຄງປະກອບໃນໄລຍະກາງແລະຍາວ. ບັນດາຝ່າຍຄວນເດັດດ່ຽວສະໜັບສະໜູນລັດທິຫຼາຍຝ່າຍ, ປົກປັກຮັກສາຂອບການຄ້າຫຼາຍຝ່າຍ,ສົ່ງເສີມການຄ້າແລະການລົງທຶນໃຫ້ມີຄວາມເສລີແລະສະດວກກວ່າເກົ່າ.
 |
