ວັນທີ 4 ພຶດສະພານີ້, ກອງປະຊຸມລັດຖະມົນຕີການເງິນ ແລະຜູ້ວ່າການທະນາຄານກາງຈີນ, ຍີ່ປຸ່ນ ແລະສ.ເກົາຫຼີຄັ້ງທີ 18 ໄດ້ຈັດຂຶ້ນຢູ່ນະຄອນຫຼວງມານິລາປະເທດຟິລິບປິນ ໂດຍບັນດາຝ່າຍໄດ້ສຸມໃສ່ແລກປ່ຽນຄຳຄິດເຫັນກ່ຽວກັບສະພາບເສດຖະກິດມະຫາພາກຈີນ, ຍີ່ປຸ່ນ ແລະສ.ເກົາຫຼີ, ການຮ່ວມມືການເງິນ-ການທະນາຄານພາກພືນ ແລະຫົວຂໍ້ອື່ນໆ, ພ້ອມທັງຮຽກຮ້ອງການຮ່ວມຄັດຄ້ານລັດທິປົກປ້ອງການຄ້າ ເພື່ອຮັບປະກັນລະບົບການຄ້າຫຼາຍຝ່າຍທີ່ເປີດປະຕູສູ່ພາຍນອກ.
ບັນດາຝ່າຍໄດ້ອອກຖະແຫຼງການຮ່ວມໂດຍຮຽກຮ້ອງໃຫ້ຮັກສາສະຕິລະວັງຕົວຕໍ່ຄວາມສ່ຽງທີ່ອາດຈະຂົ່ມຂູ່ເຖິງການຟື້ນຕົວຂອງເສດຖະກິດໂລກ, ບັນດາຝ່າຍກໍໃຫ້ຄວາມສົນໃຈຕໍ່ຄວາມສ່ຽງທີ່ເກີດຂຶ້ນຈາກການເພີ່ມທະວີຂຶ້ນຂອງລັດທິປົກປ້ອງການຄ້າ, ບາງປະເທດສຳຄັນປັບຂຶ້ນອັດຕາດອກເບຍໃນຈັງຫວະໄວເກີນຄາດໝາຍ ແລະມີຄວາມເຄັ່ງຕຶງດ້ານການເມືອງພູມ 2 ພາກຍັງມີຢູ່ເຊັ່ນດຽວກັນ.
ຖະແຫຼງການເນັ້ນຕື່ມອີກວ່າ: ຄັດຄ້ານລັດທິປົກປ້ອງການຄ້າໃນຮູບແບບຕ່າງໆ, ຮຽກຮ້ອງລະບົບການຄ້າ ແລະການລົງທຶນທີ່ບັນລຸການເປີດປະຕູສູ່ພາຍນອກ, ເພີ່ມທະວີຄວາມສາມາດ ເພື່ອຮັບມືກັບການກະທົບຈາກພາຍນອກ ແລະເຫັນດີເພີ່ມທະວີການແລກປ່ຽນ ແລະປະສານງານລະຫວ່າງຈີນ, ຍີ່ປຸ່ນ ແລະສ.ເກົາຫຼີ.
 |
