ໃນໂອກາດຕອບຄຳຖາມຂອງນັກຂ່າວທີ່ກ່ຽວຂ້ອງໃນວັນທີ 6 ພຶດສະພານີ້, ທ່ານເກີງສວງ, ໂຄສົກກະຊວງການຕ່າງປະເທດຈີນກ່າວວ່າ, ທ່ານຢາງແຈສື ກຳມະການກົມການເມືອງສູນກາງພັກກອມມູນິດຈີນ, ຫົວໜ້າຫ້ອງການຄະນະກຳມະການວຽກງານການຕ່າງປະເທດສູນກາງຈີນໄດ້ລົມໂທລະສັບກັບທ່ານໄມເຄີ ພົມເພວ ລັດຖະມົນຕີກະຊວງການຕ່າງປະເທດອາເມລິກາໃນວັນທີ 5 ພຶດສະພານີ້, ເພື່ອແລກປ່ຽນຄວາມເຫັນກ່ຽວກັບບັນຫາແຫຼມເກົາຫຼີ.
ທ່ານເກີງສວງ ກ່າວວ່າ, ທ່ານຢາງແຈສືໄດ້ບັນລະຍາຍຫຼັກໝັ້ນຂອງຈີນ, ແລະກ່າວເນັ້ນວ່າຈີນຍຶດໝັ້ນເພື່ອບັນລຸປອດອາວຸດນິວເຄຼຍຂອງແຫຼມເກົາຫຼີ, ຍຶດໝັ້ນຮັກສາສັນຕິພາບແລະສະຖຽນລະພາບຂອງແຫຼມເກົາຫຼີ, ຍຶດໝັ້ນແກ້ໄຂບັນຫາໂດຍຜ່ານການປຶກສາຫາລືແລະການເຈລະຈາ. ຫວັງວ່າຝ່າຍຕ່າງໆຈະຕັ້ງໜ້າພິຈາລະນາແນວຄິດ "ປະຕິບັດສອງໂຄຈອນຄວບຄູ່ກັນ" ທີ່ຈີນສະເໜີ, ພະຍາຍາມຮັກສາທ່າອ່ຽງອັນຕັ້ງໜ້າທີ່ແກ້ໄຂບັນຫາແຫຼມເກົາຫຼີ, ແກ້ໄຂຄວາມເປັນຫ່ວງດ້ານຄວາມປອດໄພທີ່ສົມເຫດສົມຜົນຂອງບັນດາຝ່າຍຢ່າງສົມດຸນໃນຂະບວນການຊຸກຍູ້ປອດນິວເຄຼຍ, ເພື່ອບັນລຸສັນຕິພາບແລະສະຖຽນລະພາບຍາວນານຂອງແຫຼມເກົາຫຼີກໍຄືຂອງພາກພື້ນ.
 |
