ຕອນບ່າຍວັນທີ 6 ພຶດສະພານີ້, ໂດຍຕອບສະໜອງຕາມຄຳເຊີນຂອງທ່ານໂຈໂຄ ວິໂດໂດ, ປະທານາທິບໍດີອິນໂດນເຊຍ, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ເດີນທາງດ້ວຍຍົນພິເສດໄປຮອດສະໜາມບິນສາກົນຊຸຄະໂນ ຮັດທາຂອງນະຄອນຫຼວງຈາກາຕາປະເທດອິນໂດເນເຊຍ, ແລະເລີ່ມຢ້ຽມຢາມອິນໂດເນເຊຍຢ່າງເປັນທາງການ.
ທ່ານຫຼີເຄີ້ສຽງ ກ່າວວ່າ, ປີນີ້ເປັນປີທີ່ຈີນແລະອິນໂດເນເຊຍສ້າງສາຍພົວພັນຄູ່ຮ່ວມຍຸດທະສາດຮອບດ້ານຄົບຮອບ 5 ປີ. ການຢ້ຽມຢາມຄັ້ງນີ້ຂອງຂ້າພະເຈົ້າກໍເພື່ອປັບປຸງຄວາມໄວ້ເນື້ອເຊື່ອໃຈດ້ານການເມືອງ, ລົງເລິກການຮ່ວມມືແບບຕ່າງຝ່າຍຕ່າງມີຜົນປະໂຫຍດແລະຮັດແໜ້ນມິດຕະພາບລະຫວ່າງປະຊາຊົນສອງປະເທດ. ຫວັງວ່າສອງຝ່າຍຈະທຳຄວາມພະຍາຍາມຮ່ວມ, ຊຸກຍູ້ສາຍພົວພັນແລະການຮ່ວມມືໃນຂົງເຂດຕ່າງໆລະຫວ່າງສອງປະເທດ, ແລະສ້າງຄວາມຜາສຸກຫຼາຍກວ່າເກົ່າໃຫ້ແກ່ປະຊາຊົນສອງປະເທດ.
ໃນໄລຍະຢ້ຽມຢາມອິນໂດເນເຊຍ, ທ່ານຫຼີເຄີ້ສຽງຈະພົບປະກັບທ່ານໂຈໂຄ ວິໂດໂດ, ຮ່ວມກັນປູກຕົ້ນໄມ້ມິດຕະພາບ, ແລະເປັນສັກຂີພິຍານໃນການລົງນາມເອກະສານຮ່ວມມືລະຫວ່າງສອງປະເທດແລະຮ່ວມກັນພົບປະກັບນັກຂ່າວ, ແລະຈະພົບປະກັບທ່ານຢູຊຸຟ ຄາລາ ຮອງປະທານາທິບໍດີອິນໂດເນເຊຍແລະເຂົ້າຮ່ວມກອງປະຊຸມສຸດຍອດອຸດສາຫະກຳການຄ້າຈີນ-ອິນໂດເນເຊຍ. ນອກນີ້, ທ່ານຫຼີເຄີ້ສຽງ ຍັງຈະຢ້ຽມຢາມສຳນັກງານເລຂາອາຊຽນປະຈຳຈາກາຕາ, ພົບປະກັບທ່ານລິມຈົກໂຮຍ ເລຂາທິການໃຫຍ່ອາຊຽນແລະເຂົ້າຮ່ວມກິດຈະກຳສະເຫຼີມສະຫຼອງຈີນ-ອາຊຽນສ້າງສາຍພົວພັນຄູ່ຮ່ວມຍຸດທະສາດຮອບດ້ານຄົບຮອບ 15 ປີອີກດ້ວຍ.
 |
