ຕາມຂ່າວ CRI: ທ່ານຫຼີເຄີ້ສຽງ ນາຍົກລັດຖະມົນຕີຈີນຢ້ຽມຢາມອິນໂດເນເຊຍຢ່າງເປັນທາງການແຕ່ວັນທີ 6 ຫາວັນທີ 8 ພຶດສະພານີ້, ແລະໄດ້ຮັບຄວາມສົນໃຈຢ່າງສູງຈາກສື່ມວນຊົນສຳຄັນຂອງອິນໂດເນເຊຍ. ໃນໂອກາດໃຫ້ສຳພາດຕໍ່ນັກຂ່າວ CRI, ຜູ້ຮັບຜິດຊອບສື່ມວນຊົນເຫຼົ່ານີ້ກ່າວວ່າ, ປີນີ້ເປັນປີທີ່ຈີນແລະອິນໂດເນເຊຍສ້າງສາຍພົວພັນຄູ່ຮ່ວມຍຸດທະສາດຮອບດ້ານຄົບຮອບ 5 ປີ, ການຢ້ຽມຢາມອິນໂດເນເຊຍຂອງທ່ານຫຼີເຄີ້ສຽງ ຄັ້ງນີ້ຈະຊຸກຍູ້ໃຫ້ສາຍພົວພັນລະຫວ່າງສອງປະເທດກ້າວຂຶ້ນສູ່ລະດັບໃໝ່, ແລະຊຸກຍູ້ການຮ່ວມມືທີ່ຕິດແທ້ດຕົວຈິງລະຫວ່າງສອງປະເທດຕື່ມອີກ.
ທ່ານ M. ອີຟັນ ລິເມ ຫົວໜ້າສຳນັກງານນັກຂ່າວປະຈຳຈີນຂອງຂ່າວສານອັນທະຣາເຊິ່ງເປັນຂ່າວສານທາງການຂອງອິນໂດເນເຊຍກ່າວວ່າ, ທ່ານຫຼີເຄີ້ສຽງ ຢ້ຽມຢາມອິນໂດເນເຊຍຄັ້ງນີ້ແມ່ນການເວລາທີ່ມີຄວາມໝາຍປະຫວັດສາດ. ການພົວພັນການຄ້າລະຫວ່າງສອງປະເທດຈະພັດທະນາຂຶ້ນຕື່ມອີກ, ການຄ້າລະຫວ່າງສອງປະເທດກໍຈະນັບມື້ນັບສົມດຸນຂຶ້ນ.
ທ່ານນົວ ຣາຢັນໂທ, ບັນນາທິການອາວຸໂສຂອງວາລະສານ "ແທມໂພ" ຂອງອິນໂດເນເຊຍກ່າວວ່າ, ຫວັງວ່າຈີນສາມາດສະໜອງການຊ່ວຍເຫຼືອດ້ານເງິນທຶນແລະເຕັກນິກໃຫ້ແກ່ການພັດທະນຂອງອິນໂດເນເຊຍ, ພິເສດແມ່ນເຂດພາກຕາເວັນອອກທີ່ສອກຫຼີກຂອງອິນໂດເນເຊຍ.
ທ່ານຊຸນຸ ບຸຕິຮາໂຈ, ຜູ້ອຳນວຍການໃຫຍ່ສະຖານີໂທລະພາບຂອງມະຫາວິທະຍາໄລບິນຸສອິນໂດເນເຊຍເຫັນວ່າ, ການຮ່ວມມືລະຫວ່າງອິນໂດເນເຊຍແລະຈີນຈະຊຸກຍູ້ການພັດທະນາເສດຖະກິດສັງຄົມຂອງອິນໂດເນເຊຍຢ່າງໃຫຍ່ຫຼວງ.
 |
