CRI ລາຍງານວ່າ: ທ່ານຫຼີເຄີ້ສຽງ ນາຍົກລັດຖະມົນຕີຈີນທີ່ກຳລັງຢ້ຽມຢາມອິນໂດເນເຊຍຢ່າງເປັນທາງການໄດ້ເດີນທາງໄປຢ້ຽມຢາມສຳນັກງານເລຂາອາຊຽນທີ່ນະຄອນຫຼວງຈາກາຕາໃນວັນທີ 7 ພຶດສະພານີ້ ໂດຍໄດ້ພົບປະກັບທ່ານລິມຈອກຮອຍ ເລຂາທິການໃຫຍ່ອາຊຽນ ທັງກ່າວປາໄສໃນພິທີເປີດກິດຈະກຳສະເຫຼີມສະຫຼອງຈີນ-ອາຊຽນສ້າງຕັ້ງສາຍພົວພັນຄູ່ຮ່ວມຍຸດທະສາດຄົບຮອບ 15 ປີ. ສອງຝ່າຍຢືນຢັນວ່າ: ຍິນດີຖືໂອກາດສະເຫຼີມສະຫຼອງການສ້າງຕັ້ງສາຍພົວພັນຄູ່ຮ່ວມຍຸດທະສາດຈີນ-ອາຊຽນຄົບຮອບ 15 ປີເພື່ອເສີມຂະຫຍາຍເນື້ອໃນການຮ່ວມມືດ້ານຍຸດທະສາດລະຫວ່າງສອງຝ່າຍ. ຈີນ-ອາຊຽນກຳລັງຮ່ວມກັນສ້າງອະນາຄົດໃໝ່ແຫ່ງການຮ່ວມມື.
ເຈົ້າໜ້າທີ່ອາຊຽນກ່າວວ່າ: ທ່ານນາຍົກລັດຖະມົນຕີຫຼີເຄີ້ສຽງຢ້ຽມຢາມສຳນັກງານເລຂາອາຊຽນທັງເຂົ້າຮ່ວມພິທີເປີດກິດຈະກຳສະເຫຼີມສະຫຼອງເທື່ອນີ້ໄດ້ສ່ອງແສງໃຫ້ເຫັນວ່າ ຈີນເດັດດ່ຽວສະໜັບສະໜູນອາຊຽນແລະໃຫ້ຄວາມສຳຄັນສູງຕໍ່ການຮ່ວມມືລະຫວ່າງສອງຝ່າຍໃນຕໍ່ໜ້າ. ອາຊຽນຍິນດີຮ່ວມກັບຈີນເພີ່ມທະວີການແລກປ່ຽນແລະຖອດຖອນບົດຮຽນເຊິ່ງກັນແລະກັນເພື່ອບັນລຸຄວາມຈະເລີນຮຸ່ງເຮືອງຮ່ວມກັນແລະຕ່າງຝ່າຍຕ່າງມີຜົນປະໂຫຍດ. ຊາວໂລກມີເຫດຜົນແລະເຊື່ອໝັ້ນວ່າ: ການຮ່ວມມືຈີນ-ອາຊຽນຈະມີອະນາຄົດທີ່ສົດໃສກວ່າເກົ່າ.ຈາກການສະແດງທ່າທີຂອງສອງຝ່າຍສາມາດເຫັນໄດ້ວ່າ: ຈີນແລະອາຊຽນໄດ້ບັນລຸຄວາມເປັນເອກະພາບກັນຢ່າງຫຼວງຫຼາຍກ່ຽວກັບການຮ່ວມມືໃນອະນາຄົດ.
ໜຶ່ງ: ການເຊື່ອມຕໍ່ຍຸດທະສາດການພັດທະນາຂອງສອງຝ່າຍ. ທ່ານຫຼີເຄີ້ສຽງ ຢືນຢັນວ່າ ຈີນຍິນດີເພີ່ມທະວີການເຊື່ອມຕໍ່ກັນລະຫວ່າງ ຂໍ້ລິເລີ່ມ "ໜຶ່ງແລວໜຶ່ງເສັ້ນທາງ"ກັບຍຸດທະສາດການພັດທະນາອາຊຽນ. ທ່ານລິມຈອກຮອຍຢືນຢັນວ່າ ອາຊຽນຍິນດີຕັ້ງໜ້າເຊື່ອມຕໍ່ຍຸດທະສາດການພັດທະນາຂອງສອງຝ່າຍ.
ສອງ: ລົງເລິກການຮ່ວມມືດ້ານເສດຖະກິດການຄ້າຕື່ມອີກ. ສອງຝ່າຍຢືນຢັນວ່າ ຍິນດີຄົ້ນຄວ້າການຮ່ວມມືໃໝ່ໃນຂົງເຂດການປະດິດສ້າງແລະເສດຖະກິດດີຈີຕອນ.
ສາມ: ຮ່ວມກັນຮັກສາລະບົບການຄ້າຫຼາຍຝ່າຍທີ່ເປີດປະຕູແລະປະຕິບັດຕາມລະບຽບການ. ສອງຝ່າຍລ້ວນແຕ່ສະໜັບສະໜູນໃຫ້ສຳເລັດການເຈລະຈາກ່ຽວກັບສັນຍາຄູ່ຮ່ວມເສດຖະກິດຮອບດ້ານໃນພາກພື້ນຫຼື RCEP ໂດຍໄວເທົ່າທີ່ຈະໄວໄດ້.
ທ່ານຫຼີເຄີ້ສຽງຢືນຢັນວ່າ: ຈີນແລະອາຊຽນຄວນເປັນຄູ່ຮ່ວມມືທີ່ພັດທະນາຮ່ວມກັນ, ຮ່ວມກັນສ້າງສັນຕິພາບ,ເປີດປະຕູແລະຕ່າງຝ່າຍຕ່າງມີຜົນປະໂຫຍດ, ບຸກເບີກການປະດິດສ້າງ,ກວມລວມແລະຖອດຖອນບົດຮຽນເຊິ່ງກັນແລະກັນ. ຈີນຈະສືບຕໍ່ເຄົາລົບສະພາບແຫ່ງຊາດແລະເສັ້ນທາງພັດທະນາຂອງບັນດາປະເທດໃນອາຊຽນແລະເພີ່ມທະວີການແລກປ່ຽນແລະຮ່ວມມືກັບບັນດາປະເທດອາຊຽນ.
