ຕອນທ່ຽງວັນທີ 7 ພຶດສະພານີ້, ທ່ານຫຼີເຄີ້ສຽງ ນາຍົກລັດຖະມົນຕີຈີນແລະທ່ານໂຈໂຄ ວິໂດໂດ ປະທານາທິບໍດີອິນໂດເນເຊຍໄດ້ເຂົ້າຮ່ວມພິທີຖະແຫຼງຂ່າວຢູ່ທຳນຽບປະທານາທິບໍດີແຂວງໂບໂກພາຍຫຼັງສຳເລັດການພົບປະກັນ.
ທ່ານຫຼີເຄີ້ສຽງ ຕີລາຄາຢ່າງຕັ້ງໜ້າຕໍ່ຜົນການພົບປະສອງຝ່າຍແລະກ່າວວ່າ, ສອງຝ່າຍພ້ອມກັນເຫັນວ່າຄວນຍຶດໝັ້ນໄປຕາມເສັ້ນທາງພັດທະນາໂດຍສັນຕິ, ຮ່ວມກັນຮັກສາສັນຕິພາບແລະສະຖຽນລະພາບຂອງພາກພື້ນກໍຄືຂອງໂລກໂດຍອີງຕາມກົດໝາຍແລະລະບຽບການສາກົນທີ່ປະຊາຄົມໂລກຮັບຮອງ. ໃນຖານະເປັນກຸ່ມເສດຖະກິດສຳຄັນໃນໂລກ, ຈີນແລະອິນໂດເນເຊຍຄວນພະຍາຍາມຮ່ວມເພື່ອຊຸກຍູ້ໃຫ້ການຄ້າແລະການລົງທຶນຫັນເປັນແບບເສລີແລະສະດວກກວ່າເກົ່າ.
ທ່ານຫຼີເຄີ້ສຽງ ກ່າວຕື່ມວ່າ, ລັດຖະບານຈີນຍິນດີຊີ້ນຳໃຫ້ວິສາຫະກິດຈີນລົງທຶນຢູ່ອິນໂດເນເຊຍໂດຍອີງຕາມຫຼັກການຕະຫຼາດ, ຊຸກຍູ້ການປະກອບອາຊີບຂອງທ້ອງຖິ່ນ, ຫວັງວ່າອິນໂດເນເຊຍຈະສືບຕໍ່ສ້າງສະພາບແວດລ້ອມໃນການດຳເນີນທຸລະກິດທີ່ດີໃຫ້ແກ່ຈີນ.
ທ່ານໂຈໂຄ ວິໂດໂດ ກ່າວວ່າ, ຂ້າພະເຈົ້າໄດ້ພົບປະຫາລືກັບທ່ານຫຼີເຄີ້ສຽງແລະໄດ້ຮັບໝາກຜົນອຸດົມສົມບູນ. ສອງຝ່າຍເຫັນວ່າສາຍພົວພັນຄູ່ຮ່ວມຍຸດທະສາດຮອບດ້ານລະຫວ່າງສອງປະເທດແມ່ນຕ່າງຝ່າຍຕ່າງມີຜົນປະໂຫຍດ, ແລະໄດ້ຕີລາຄາສູງຕໍ່ການປະກອບສ່ວນຂອງອາຊຽນໃນການຊຸກຍູ້ສັນຕິພາບແລະການພັດທະນາຂອງພາກພື້ນກໍຄືຂອງໂລກຕະຫຼອດ 50 ປີຜ່ານມາ, ພ້ອມທັງຍິນດີເພີ່ມທະວີການຮ່ວມມືລະຫວ່າງສອງປະເທດພາຍໃຕ້ຂອບອາຊຽນ-ຈີນ.
 |
