ຕອນຄ່ຳວັນທີ 7 ພຶດສະພານີ້ຕາມເວລາທ້ອງຖິ່ນ, ທ່ານຫຼີເຄີ້ສຽງ ນາຍົກລັດຖະມົນຕີຈີນຮ່ວມກັບທ່ານຈູຊູຟ ກາລາ ຮອງປະທານທິບໍດີອິນໂດເນເຊຍເຂົ້າຮ່ວມກອງປະຊຸມສຸດຍອດອຸດສາຫະກຳການຄ້າຈີນ-ອິນໂດເນເຊຍທີ່ຈັດຂຶ້ນຢູ່ນະຄອນຫຼວງຈາກາຕາ.
ທ່ານຫຼີເຄີ້ສຽງກ່າວວ່າ, ຈີນໃຫ້ຄວາມສຳຄັນສູງຕໍ່ການຂະຫຍາຍການພົວພັນກັບອິນໂດເນເຊຍ. ປີ 2013, ທ່ານປະທານສີຈິ້ນຜິງໄດ້ຢ້ຽມຢາມອິນໂດເນເຊຍຢ່າງສຳເລັດຜົນ ແລະ ໄດ້ວາງທິດທາງໃຫ້ແກ່ການຂະຫຍາຍການພົວພັນສອງປະເທດ. ພາຍໃຕ້ຄວາມພະຍາຍາມຮ່ວມຂອງວົງການຕ່າງໆຂອງສອງປະເທດ, ການພົວພັນຈີນ-ອິນໂດເນເຊຍໄດ້ຂະຫຍາຍຕົວຢ່າງວ່ອງໄວ ແລະ ການຮ່ວມມືທາງເສດຖະກິດການຄ້າລະຫວ່າງສອງປະເທດໄດ້ກາຍເປັນຂົງເຂດການຮ່ວມມືທີ່ຄຶກຄື້ນທີ່ສຸດ ແລະ ມີຜົນສຳເລັດຫຼາຍທີ່ສຸດ.
ທ່ານຫຼີເຄີ້ສຽງຊີ້ວ່າ, ການຢ້ຽມຢາມເທື່ອນີ້ຂອງຂ້າພະເຈົ້າກໍເພື່ອປັບປຸງການພົວພັນລະຫວ່າງສອງປະເທດໃຫ້ຂະຫຍາຍຕົວດີຂຶ້ນກວ່າເກົ່າ ແລະ ຊຸກຍູ້ການຮ່ວມມືທີ່ຕິດແທດຕົວຈິງລະຫວ່າງສອງປະເທດໃຫ້ກ້າວຂຶ້ນສູ່ລະດັບໃໝ່.
ສອງປະເທດຈະເປີດກວ້າງການຮ່ວມມືດ້ານການລົງທຶນ ແລະ ຄວາມສາມາດການຜະລິດ. ຈີນຍິນດີເອົາຂໍ້ລິເລີ່ມ "ໜຶ່ງແລວໜຶ່ງເສັ້ນທາງ" ເຊື່ອມຕໍ່ກັບໂຄງຄວາມຄິດ "ຈຸດຄ້ຳຊູທາງທະເລທົ່ວໂລກ" ຂອງອິນໂດເນເຊຍ, ພັດທະນາຫຼາຍໂຄງການຕົວແບບ, ສະໜັບສະໜູນວິສາຫະກິດຈີນເຂົ້າຮ່ວມການສ້າງ "ແລວທາງເສດຖະກິດກວມລວມພາກພື້ນ" ຂອງອິນໂດເນເຊຍ, ຊ່ວຍອິນໂດເນເຊຍກໍ່ສ້າງພື້ນຖານໂຄງລ່າງ ແລະ ປຶກສາຫາລືການຮ່ວມມືກັນໃນການສ້າງທ່າກຳປັ່ນ, ເສດຖະກິດແຄມທະເລ ແລະ ຂົງເຂດອື່ນໆ ພ້ອມທັງຍິນດີໃຫ້ອິນໂດເນເຊຍສ້າງຕັ້ງສູນສົ່ງເສີມການລົງທຶນຢູ່ຈີນເຊັ່ນກັນ.
ສອງຝ່າຍຈະຊຸກຍູ້ຫັນການຄ້າ ແລະ ການລົງທຶນເປັນແບບເສລີ ແລະ ມີຄວາມສະດວກສະບາຍ. ຈີນຍິນດີນຳເຂົ້າຜະລິດຕະພັນທີ່ມີເອກະລັກພິເສດຂອງອິນໂດເນເຊຍໃຫ້ຫຼາຍກວ່າເກົ່າ, ອອກແຮງພັດທະນາທຸລະກິດເອເລັກໂຕຼນິກຂ້າມຊາຍແດນ ເພື່ອເປັນຂົວຕໍ່ໃຫ້ແກ່ການຮ່ວມມືລະຫວ່າງວິສາຫະກິດຂະໜາດກາງ ແລະ ນ້ອຍຂອງສອງປະເທດ.
ນອກນີ້, ສອງຝ່າຍຍັງຈະຮັດແໜ້ນການແລກປ່ຽນ ແລະ ຮ່ວມມືດ້ານວັດທະນະທຳຕື່ມອີກ. ຈີນຍິນດີດຳເນີນການແລກປ່ຽນ ແລະ ຮ່ວມມືໃນຂົງເຂດການສຶກສາ, ວັດທະນະທຳ, ການທ່ອງທ່ຽວ, ສື່ມວນຊົນ ແລະ ກິລາ ກັບອິນໂດເນເຊຍ ເພື່ອເຮັດໃຫ້ທັດສະນະຄະຕິສັນຕິພາບ, ມິດຕະພາບ ແລະ ຮ່ວມມືກັນຂອງສອງປະເທດຝັງເຂົ້າໃນດວງໃຈຂອງປະຊາຊົນທັງສອງປະເທດ.
ທ່ານກາລາກ່າວວ່າ, ການໄຂກອງປະຊຸມສຸດຍອດເທື່ອນີ້ສະແດງໃຫ້ເຫັນວ່າ, ຜູ້ນຳວົງການອຸດສາຫະກຳການຄ້າສອງປະເທດມີຄວາມໝັ້ນໃຈເຕັມປ່ຽມຕໍ່ການພັດທະນາເສດຖະກິດການຄ້າລະຫວ່າງສອງຝ່າຍ. ອິນໂດເນເຊຍຊົມເຊີຍຈີນເພີ່ມທະວີການລົງທຶນຢູ່ປະເທດຕົນ, ເປີດກວ້າງການສົ່ງອອກຜະລິດຕະພັນຕໍ່ກັນ, ລົງເລິກການຮ່ວມມືໃນຂົງເຂດຕ່າງໆ. ລັດຖະບານສອງປະເທດຈະວາງນະໂຍບາຍທີ່ສົມຄູ່ກັນ, ສ້າງສະພາບແວດລ້ອມທີ່ດີກວ່າເກົ່າ ເພື່ອຊຸກຍູ້ການລົງທຶນ ແລະ ທຸລະກິດລະຫວ່າງສອງຝ່າຍ.
 |
