ປະທານສະມາຄົມມິດຕະພາບຍີ່ປຸ່ນ-ຈີນຄອງຄອຍການຢ້ຽມຢາມຂອງນາຍົກຈີນຈະປັບປຸງການພົວພັນລະຫວ່າງສອງປະເທດ

ໂດຍຕອບສະໜອງຕາມຄຳເຊີນຂອງທ່ານຊິນໂຈະ ອາເບະ ນາຍົກລັດຖະມົນຕີຍີ່ປຸ່ນ, ທ່ານຫຼີເຄີ້ສຽງ ນາຍົກລັດຖະມົນຕີຈີນເດີນທາງໄປຮອດຍີ່ປຸ່ນໃນຕອນຄ່ຳວັນທີ 8 ພຶດສະພານີ້ ເພື່ອເຂົ້າຮ່ວມກອງປະຊຸມສຸດຍອດຈີນ, ຍີ່ປຸ່ນ ແລະ ສ.ເກົາຫຼີຄັ້ງທີ 7 ແລະ ຢ້ຽມຢາມຍີ່ປຸ່ນຢ່າງເປັນທາງການ. ນີ້ແມ່ນນາຍົກຈີນທີ່ໄປຢ້ຽມຢາມຍີ່ປຸ່ນຢ່າງເປັນທາງການຄັ້ງທຳອິດໃນຮອບ 8 ປີ ແລະ ກໍແມ່ນກອງປະຊຸມສຸດຍອດຈີນ, ຍີ່ປຸ່ນ ແລະ ສ.ເກົາຫຼີຈັດຂຶ້ນອີກຄັ້ງໜຶ່ງ ໃນຮອບ 2 ປີເຄິ່ງ.

ກ່ອນທ່ານຫຼີເຄີ້ສຽງໄປຢ້ຽມຢາມຍີ່ປຸ່ນ, ນັກຂ່າວ CRI ໄດ້ສຳພາດທ່ານນິວະ ອູອີຈິໂຣ ປະທານສະມາຄົມມິດຕະພາບຍີ່ປຸ່ນ-ຈີນ, ອະດີດເອກອັກຄະລັດຖະທູດຍີ່ປຸ່ນປະຈຳຈີນ. ທ່ານກ່າວວ່າ, ການມາຢ້ຽມຢາມຍີ່ປຸ່ນຂອງທ່ານນາຍົກຫຼີເຄີ້ສຽງຄັ້ງນີ້ຈະມີຄວາມໝາຍສຳຄັນໃນການປັບປຸງການພົວພັນລະຫວ່າງສອງປະເທດຍີ່ປຸ່ນ-ຈີນ. ເວົ້າສຳລັບການພົວພັນຈີນ-ຍີ່ປຸ່ນແລ້ວ, ປີນີ້ພໍດີເປັນປີທີ່ສອງປະເທດລົງນາມໃນ "ສັນຍາສັນຕິພາບ ແລະ ມິດຕະພາບຈີນ-ຍີ່ປຸ່ນ" ຄົບຮອບ 40 ປີ. ພາຍໃຕ້ເບື້ອງຫຼັງດັ່ງກ່າວ, ສອງປະເທດລ້ວນແຕ່ມີຈຸດປະສົງຢາກປັບປຸງການພົວພັນລະຫວ່າງສອງປະເທດໃຫ້ດີຂຶ້ນ.