ຕອນຄ່ຳວັນທີ 8 ພຶດສະພານີ້, ໂທລະພາບສູນກາງ ສປປ ເກົາຫຼີໄດ້ລາຍງານຂ່າວກ່ຽວກັບທ່ານກິມເຈິງອຸນ ຜູ້ນຳສູງສຸດ ສປປ ເກົາຫຼີໄດ້ພົບປະກັບທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ ປະທານປະເທດຈີນ ຢູ່ນະຄອນຕ້າຫຼຽນຂອງປະເທດຈີນລະຫວ່າງວັນທີ 7 ຫາ 8 ພຶດສະພານີ້ ແລະ ໄດ້ຕີລາຄາສູງຕໍ່ການພົບປະກັນໃນຄັ້ງນີ້ ໂດຍຊີ້ອອກວ່າ, "ການພົບປະກັນຄັ້ງປະຫວັດສາດ" ນີ້ຈະເປັນໂອກາດສຳຄັນແຫ່ງການຊຸກຍູ້ໃຫ້ການພົວພັນມິດຕະພາບລະຫວ່າງສອງປະເທດຂະຫຍາຍຕົວຕື່ມອີກ.
ຂ່າວລາຍງານຕື່ມວ່າ, ການພົບປະກັນຄັ້ງນີ້ໄດ້ຈັດຂຶ້ນໃນໄລຍະທີ່ການພົວພັນລະຫວ່າງສອງພັກ, ສອງລັດ ແລະ ສອງປະເທດກ້າວເຂົ້າສູ່ໄລຍະທີ່ດີທີ່ສຸດ. ພ້ອມທັງເປັນໂອກາດສຳຄັນໃນການຂະຫຍາຍການພົວພັນມິດຕະພາບລະຫວ່າງສອງປະເທດຕື່ມອີກ ໃນຖານະເປັນການຄັດເລືອກຍຸດທະສາດຂອງສອງພັກ ແລະ ສອງລັດ ບົນພື້ນຖານທີ່ສອງຝ່າຍສືບທອດມູນເຊື້ອໄປມາຫາສູ່ກັນລະຫວ່າງຜູ້ນຳຂັ້ນສູງສຸດສອງຝ່າຍ ແລະ ສອດຄ່ອງກັບຄວາມຮຽກຮ້ອງຕ້ອງການໃນຍຸກໃໝ່. ມິດຕະພາບລະຫວ່າງ ສປປ ເກົາຫຼີ ກັບ ຈີນຈະຖືກຮັດແໜ້ນຂຶ້ນຕື່ມ ໂດຍໄປຕາມທ່ວງທ່າຂອງຍຸກສະໄໝ.
 |
