ຕອນບ່າຍວັນທີ 9 ພຶດສະພານີ້ ຢູ່ນະຄອນຫຼວງໂຕກຽວແຫ່ງຍີ່ປຸ່ນ, ທ່ານ ຫຼີເຄີ້ສຽງ ນາຍົກລັດຖະມົນຕີຈີນໄດ້ເຂົ້າຢ້ຽມຄຳນັບທ່ານ ມຸນເຈອິນ ປະທານາທິບໍດີສ.ເກົາຫຼີ.
ໂອກາດດັ່ງກ່າວ, ທ່ານ ຫຼີເຄີ້ສຽງ ໄດ້ຝາກຄຳຢື້ຢາມຖາມຂ່າວອັນສະໜິດສະໜົມຂອງທ່ານ ສີຈິ້ນຜິງ ປະທານປະເທດຈີນຕໍ່ທ່ານ ມຸນເຈອິນ. ທ່ານ ຫຼີເຄີ້ສຽງ ກ່າວຕື່ມວ່າ, ຈີນແລະສ.ເກົາຫຼີແມ່ນປະເທດບ້ານໃກ້ເຮືອນຄຽງທີ່ມີໄມຕີຈິດມິດຕະພາບຕໍ່ກັນແລະເປັນຄູ່ຮ່ວມມືທີ່ສຳຄັນ, ຈີນຍິນດີເພີ່ມທະວີການຕິດຕໍ່ພົວພັນທາງຍຸດທະສາດກັບສ.ເກົາຫຼີ, ຊຸກຍູ້ສະຖານະການຂອງພາກພື້ນໃຫ້ຜ່ອນຄາຍລົງຕື່ມອີກ, ຫວັງວ່າ, ສ.ເກົາຫຼີຈະສືບຕໍ່ແກ້ໄຂບັນຫາລະບົບຕ້ານຂີປະນາວຸດຫຼື "ທັດ" ໃຫ້ເໝາະສົມ.
ທ່ານ ຫຼີເຄີ້ສຽງ ຊີ້ໃຫ້ເຫັນວ່າ, ກອງປະຊຸມຜູ້ນຳຈີນ-ຍີ່ປຸ່ນ-ສ.ເກົາຫຼີຄັ້ງນີ້ ໄດ້ບັນລຸຄວາມເປັນເອກະພາບກັນໃໝ່ຫຼາຍຂໍ້ກ່ຽວກັບການເພີ່ມທະວີການຮ່ວມມື, ປົກປັກຮັກສາສະຖຽນລະພາບຂອງພາກພື້ນ, ຊຸກຍູ້ການພັດທະນາຂອງພາກພື້ນ ແລະອື່ນໆ. ຫຼັງກອງປະຊຸມ, ຈີນຈະເປັນປະເທດປະທານຂອງກົນໄກການຮ່ວມມືຈີນ-ຍີ່ປຸ່ນ-ສ.ເກົາຫຼີ, ຫວັງວ່າຈະຮ່ວມກັບຍີ່ປຸ່ນແລະສ.ເກົາຫຼີ ເພື່ອຊຸກຍູ້ຂະບວນການຮ່ວມມືສາມປະເທດແລະການເຊື່ອມໂຍງເຂົ້າກັນຂອງພາກພື້ນ.
ທ່ານ ມຸນເຈອິນ ກ່າວວ່າ, ຊົມເຊີຍກອງປະຊຸມຜູ້ນຳສ.ເກົາຫຼີ-ຈີນ-ຍີ່ປຸ່ນທີ່ໄດ້ຮັບຜົນງານຢ່າງຕັ້ງໜ້າ. ຫວັງວ່າ, ສອງຝ່າຍຈະຮັກສາການໄປມາຫາສູ່ກັນລະຫວ່າງການນຳຂັ້ນສູງ, ປັບປຸງຄວາມໄວ້ເນື້ອເຊື່ອໃຈດ້ານການເມືອງ, ຊຸກຍູ້ການຮ່ວມມືຕົວຈິງ ແລະການພົວພັນສອງປະເທດໃຫ້ຂະຫຍາຍຕົວໃໝ່.
 |
