ວັນທີ 9 ພຶດສະພານີ້, ສະພາຄວາມໝັ້ນຄົງອົງການສະຫະປະຊາຊາດ ໄດ້ອອກຖະແຫຼງການ, ໂດຍຮຽກຮ້ອງໃຫ້ລັດຖະບານມຽນມາສ້າງເງື່ອນໄຂໃຫ້ຊາວອົບພະຍົບໂຣຮິງຢາກັບຄືນບ້ານເກີດ, ທັງປະຕິບັດຕາມຄຳໝັ້ນສັນຍາທີ່ຈະລົງໂທດຜູ້ກໍ່ຄວາມຮຸນແຮງດ້ວຍກົດໝາຍ.
ຖະແຫຼງການລະບຸວ່າ, ສະພາຄວາມໝັ້ນຄົງຮູ້ສຶກຕື່ນຕົກໃຈຕໍ່ຄວາມຮຸນແຮງຂອງວິກິດການມະນຸດສະທຳຂອງມຽນມາຄັ້ງນີ້ ແລະເປັນຫ່ວງຕໍ່ສະພາບການໃນປັດຈຸບັນ. ສະພາຄວາມໝັ້ນຄົງໄດ້ສັງເກດເຫັນເຖິງຄວາມພະຍາຍາມຂອງລັດຖະບານມຽນມາເພື່ອໃຫ້ຊາວອົບພະຍົບກັບຄືນບ້ານເກີດ, ແຕ່ທວງໃຫ້ລັດຖະບານມຽນມາຈົ່ງພະຍາຍາມເຮັດວຽກໃຫ້ດີກວ່າເກົ່າ ເພື່ອສ້າງເງື່ອນໄຂໃຫ້ຊາວອົບພະຍົບແລະຜູ້ບໍ່ມີບ່ອນເພິ່ງພາອາໄສນັ້ນກັບຄືນບ້ານເກີດຢູ່ລັດຍະໄຂ່ຢ່າງປອດໄພ, ສະໝັກໃຈ ແລະມີກຽດ, ພ້ອມທັງແກ້ໄຂວິກິດການຄັ້ງນີ້ຈາກຮາກຖານ.
ຖະແຫຼງການລະບຸຕື່ມອີກວ່າ, ສະພາຄວາມໝັ້ນຄົງເລັ່ງທວງໃຫ້ລັດຖະບານມຽນມາຈົ່ງປະຕິບັດຕາມຄຳໝັ້ນສັນຍາຂອງຕົນ, ລົງໂທດຕໍ່ຜູ້ກໍ່ເຫດຄວາມຮຸນແຮງຕາມກົດໝາຍ, ທັງອະນຸຍາດໃຫ້ອົງການສະຫະປະຊາຊາດແລະອົງການຊ່ວຍເຫຼືອມະນຸດສະທຳອື່ນໆເຂົ້າໄປລັດຍະໄຂ່ຢ່າງປອດໄພແລະບໍ່ມີອຸປະສັກກີດຂວາງໃດໆໃນທັນທີ.
 |
