ຈີນໄດ້ກຳນົດເອົາອາທິດທີ 3 ຂອງເດືອນພຶດສະພາທຸກປີເປັນວັນຊ່ວຍເຫຼືອຄົນພິການທົ່ວປະເທດ. ວັນທີ 20 ພຶດສະພາ 2018 ນີ້ເປັນວັນຊ່ວຍເຫຼືອຄົນພິການທົ່ວປະເທດຄັ້ງທີ 28 . ຕາມຂ່າວແຈ້ງວ່າ: ຮອດມື້ນັ້ນ, ແຫ່ງຕ່າງໆໃນທົ່ວປະເທດຈີນຈະຈັດກິດຈະກຳຕ່າງໆໂດຍປິ່ນອ້ອມຫົວຂໍ້ "ເປົ້າໝາຍການສ້າງສັງຄົມອິ່ມໜຳສຳລານໃຫ້ສຳເລັດຮອບດ້ານຕ້ອງເຂົ້າເຖິງຄົນພິການທຸກຄົນ" ເພື່ອລະດົມຂົນຂວາຍທົ່ວສັງຄົມຊ່ວຍເຫຼືອຄົນພິການດ້ວຍການແກ້ໄຂບັນຫາຕົວຈິງໃຫ້ຄົນພິການ.
ຫຼາຍພາກສ່ວນເຊັ່ນສະຫະພັນຄົນພິການຈີນໄດ້ແຈ້ງຂ່າວໃນເມື່ອມໍ່ໆນີ້ວ່າ: ໃນໄລຍະການສະຫຼອງວັນຊ່ວຍເຫຼືອຄົນພິການທົ່ວປະເທດປີນີ້, ແຫ່ງຕ່າງໆໃນທົ່ວປະເທດຈະເປີດເຜີຍຂໍ້ມູນລາຍລະອຽດກ່ຽວກັບກິດຈະກຳໃນວັນສຳຄັນນີ້ຜ່ານວີເຊັດ,ໄມໂຄຣບຼ໋ອກແລະຊ່ອງທາງອື່ນໆ ທັງໃຊ້ຮູບແບບຕ່າງໆເປັນຕົ້ນການແຈກແຜ່ນພັບ,ຕິດໃບໂຄສະນາ,ສ້າງແລະລົງໂຄສະນາເພື່ອສາທາລະນະປະໂຫຍດໃນສື່ຕ່າງໆເຊັ່ນໜັງສືພິມ,ວາລະສານ, ວິທະຍຸ,ໂທລະພາບແລະອື່ນໆເພື່ອລະດົມໃຫ້ທົ່ວສັງຄົມໃຫ້ຄວາມສຳຄັນແລະເຂົ້າໃຈຄົນພິການຫຼາຍຂຶ້ນ, ສົ່ງເສີມໃຫ້ຄົນໃຈບຸນແລະອົງການຕ່າງໆປະກອບສ່ວນເຂົ້າໃນວຽກງານຊ່ວຍເຫຼືອຄົນພິການໃຫ້ຫຼາຍກວ່າເກົ່າ.
