ຕອນບ່າຍວັນທີ 9 ພຶດສະພານີ້, ທ່ານຮວງຊີລຽນ ເອກອັກຄະລັດຖະທູດຈີນປະຈຳອາຊຽນໄດ້ເຂົ້າຮ່ວມພິທີສ້າງຕັ້ງສູນຄົ້ນຄວ້າການສ້າງທຸລະກິດການປະດິດສ້າງໃໝ່ອາຊຽນຂອງວິທະຍາໄລປະຊາສຳພັນລອນດອນ ໂຮງຮຽນຊັ້ນສູງທີ່ມີຊື່ສຽງຂອງອິນໂດເນເຊຍ ຕາມຄຳເຊີນ ແລະ ຮ່ວມກັບທ່ານໂຈຮາຣີ ເອກອັກຄະລັດຖະທູດອິນໂດເນເຊຍປະຈຳຈີນ ເຜີຍແຜ່ສະພາບການທີ່ທ່ານຫຼີເຄີ້ສຽງ ນາຍົກລັດຖະມົນຕີຈີນຢ້ຽມຢາມສຳນັກງານເລຂາອາຊຽນ, ການພັດທະນາເສດຖະກິດດີຈີຕອນຈີນ ແລະ ການຮ່ວມມືໃນຂົງເຂດປະດິດສ້າງໃໝ່ລະຫວ່າງຈີນ-ອາຊຽນ.
ທ່ານຮວງຊີລຽນກ່າວວ່າ, ທ່ານນາຍົກຫຼີເຄີ້ສຽງໄດ້ຢ້ຽມຢາມສຳນັກງານເລຂາອາຊຽນຢ່າງສຳເລັດຜົນໃນຫວ່າງມໍ່ໆມານີ້ ແລະ ຊີ້ອອກວ່າ, ການຮ່ວມມືການປະດິດສ້າງໃໝ່ອາດຈະສາມາດກາຍເປັນຈຸດເຕີບໂຕໃໝ່ໃນການຮ່ວມມືລະຫວ່າງຈີນກັບອາຊຽນ.
ທ່ານຮວງຊີລຽນໄດ້ເຜີຍແຜ່ຜົນສຳເລັດອັນພົ້ນເດັ່ນໃນການພັດທະນາເສດຖະກິດສັງຄົມນັບແຕ່ຈີນດຳເນີນການປະຕິຮູບ ແລະ ໄຂປະຕູສູ່ພາຍນອກເປັນຕົ້ນມາ ດ້ວຍລາຍລະອຽດຕ່າງໆ ແລະ ເນັ້ນໃສ່ເຜີຍແຜ່ບົດຮຽນສຳເລັດຜົນຂອງຈີນໃນການຊຸກຍູ້ໃຫ້ເສດຖະກິດດີຈີຕອນພັດທະນາຢ່າງວ່ອງໄວໃນຫຼາຍປີມໍ່ໆມານີ້ ໂດຍຊີ້ອອກວ່າ, ຈີນ ແລະ ອາຊຽນລ້ວນແຕ່ເປັນຫົວຈັກຂອງການພັດທະນາເສດຖະກິດດີຈີຕອນທົ່ວໂລກ, ສອງຝ່າຍມີຄວາມບົ່ມຊ້ອນອັນມະຫາສານໃນດ້ານນີ້. ຈີນຍິນດີແບ່ງປັນບົດຮຽນສຳເລັດຜົນໃນດ້ານ "ອິນເຕີເນັດ +", "ມວນຊົນສ້າງທຸລະກິດມວນຊົນປະດິດສ້າງໃໝ່" ແລະ ອື່ນໆ ກັບອາຊຽນ, ເພີ່ມທະວີການຮ່ວມມືຕິດແທດຕົວຈິງໃນຂົງເຂດທີ່ກ່ຽວຂ້ອງໃນດ້ານເສດຖະກິດດີຈີຕອນ, ທຸລະກິດເອເລັກໂຕຼນິກ, ເສດຖະກິດແບ່ງປັນ ແລະ ອື່ນໆ.
ທ່ານໂຮເຊ ແລະ ທ່ານໂຈຮາຣີລ້ວນແຕ່ກ່າວວ່າ, ບັນດາປະເທດອາຊຽນ ເຊິ່ງລວມທັງອິນໂດເນເຊຍມີທ່າແຮງຂອງຕົນໃນການພັດທະນາເສດຖະກິດດີຈີຕອນ ແລະ ມີຄວາມບົ່ມຊ້ອນຢ່າງຫຼວງຫຼາຍ. ເສດຖະກິດດີຈີຕອນຂອງຈີນໄດ້ພັດທະນາຢ່າງວ່ອງໄວ ແລະ ເປັນລະດັບນຳໜ້າຂອງໂລກ, ຈະສາມາດສະໜອງທຶນຮອນ, ເຕັກນິກ ແລະ ຫົວຄິດປະດິດສ້າງໃຫ້ແກ່ການເຕີບໂຕຂອງວິສາຫະກິດອາຊຽນທີ່ຕ້ອງການດ່ວນ ແລະ ສອງຝ່າຍມີອະນາຄົດການຮ່ວມມືອັນກວ້າງຂວາງໃນດ້ານນີ້.
 |
