ນາຍົກຈີນເຂົ້າຮ່ວມກິດຈະກຳສະຫຼອງວັນເຊັນສັນຍາສັນຕິພາບມິດຕະພາບຈີນ-ຍີ່ປຸ່ນຄົບຮອບ 40 ປີ

    ຕອນທ່ຽງວັນທີ 10 ພຶດສະພານີ້, ຢູ່ນະຄອນຫຼວງໂຕກຽວຂອງຍີ່ປຸ່ນ, ທ່ານ ຫຼີເຄີ້ສຽງ ນາຍົກລັດຖະມົນຕີຈີນ ກັບທ່ານ ຊິນໂຈະ ອາເບະ ນາຍົກລັດຖະມົນຕີຍີ່ປຸ່ນ ໄດ້ເຂົ້າຮ່ວມກິດຈະກຳລະນຶກວັນເຊັນສັນຍາສັນຕິພາບມິດຕະພາບຈີນ-ຍີ່ປຸ່ນຄົບຮອບ 40 ປີ ແລະງານລ້ຽງຮັບຮອງເພື່ອເປັນກຽດແກ່ທ່ານ ຫຼີເຄີ້ສຽງ ຢ້ຽມຢາມຍີ່ປຸ່ນ. ບຸກຄົນວົງການການເມືອງແລະເສດຖະກິດ ພ້ອມດ້ວຍປະຊາຊົນຜູ້ມີມິດຕະພາບຕໍ່ກັນຂອງສອງປະເທດເກືອບ 2000 ຄົນໄດ້ເຂົ້າຮ່ວມ.

    ໂອກາດນີ້, ທ່ານ ຫຼີເຄີ້ສຽງ ໄດ້ກ່າວປາຖະກະຖາວ່າ, ປີນີ້ ແມ່ນປີທີ່ເຊັນສັນຍາສັນຕິພາບມິດຕະພາບຈີນຍີ່ປຸ່ນຄົບຮອບ 40 ປີ. ເອກະສານການເມືອງຈີນ-ຍີ່ປຸ່ນ 4 ສະບັບແມ່ນທິດທາງທີ່ຕ້ອງຍຶດໝັ້ນຢ່າງເດັດດ່ຽວໃນການພັດທະນາສາຍພົວພັນສອງປະເທດຢ່າງປອດໄສ. ຂໍພຽງແຕ່ວ່າສອງຝ່າຍປະຕິບັດຕາມເອກະສານການເມືອງ 4 ສະບັບນີ້ຢ່າງສະເໝີຕົ້ນສະເໝີປາຍຕາມທິດທາງດຽວກັນແລ້ວ, ສາຍພົວພັນສອງປະເທດກໍຈະສາມາດຂະຫຍາຍໄປໜ້າຢ່າງໜັກແໜ້ນ.

    ທ່ານ ຫຼີເຄີ້ສຽງ ເນັ້ນວ່າ, ໃນໄລຍະຢ້ຽມຢາມຍີ່ປຸ່ນຄັ້ງນີ້, ຂ້າພະເຈົ້າໄດ້ຮ່ວມກັບຜູ້ນຳຍີ່ປຸ່ນສະຫຼຸບແລະຖອດຖອນບົດຮຽນທາງບວກແລະທາງລົບໃນເມື່ອກ່ອນ ແລະໄດ້ບັນລຸຄວາມເປັນເອກະພາບກັນທີ່ສຳຄັນຕ່າງໆກ່ຽວກັບການຊຸກຍູ້ໃຫ້ສາຍພົວພັນສອງປະເທດກັບຄືນສູ່ເສັ້ນທາງທີ່ເປັນປົກກະຕິ ແລະບັນລຸການພັດທະນາຢ່າງປອດໄສ, ຍາວນານ ແລະໜັກແໜ້ນ. ໃນດ້ານການເມືອງ, ພວກຂ້າພະເຈົ້າລ້ວນແຕ່ເຫັນດີຖືປະຫວັດສາດເປັນແວ່ນແຍງ, ຫັນໜ້າໄປສູ່ອະນາຄົດ, ການນຳຂັ້ນສູງຮັກສາການໄປມາຫາສູ່ກັນ, ຟື້ນຟູກົນໄກການສົນທະນາແລະການຮ່ວມມືໃນທຸກຂົງເຂດລະຫວ່າງສອງປະເທດຢ່າງຮອບດ້ານ, ເພີ່ມທະວີຄວາມໄວ້ເນື້ອເຊື່ອໃຈກັນທາງການເມືອງ ແລະ ແກ້ໄຂຄວາມຂັດແຍ້ງກັນຢ່າງເໝາະສົມ. ໃນດ້ານເສດຖະກິດ, ພວກຂ້າພະເຈົ້າລ້ວນແຕ່ເຫັນດີເລັງໃສ່ການພັດທະນາແລະການປັບປຸງຊີວິດການເປັນຢູ່ຂອງປະຊາຊົນສອງປະເທດໃຫ້ດີຂຶ້ນ, ຍົກລະດັບການຮ່ວມມືຕົວຈິງລະຫວ່າງສອງປະເທດໃຫ້ສູງຂຶ້ນສູ່ລະດັບໃໝ່ ແລະ ບັນລຸຕ່າງຝ່າຍຕ່າງໄດ້ຮັບຜົນປະໂຫຍດໃຫ້ດີກວ່າເກົ່າ. ໃນດ້ານວັດທະນະທຳ, ພວກຂ້າພະເຈົ້າເຫັນດີເພີ່ມທະວີການແລກປ່ຽນຕື່ມອີກ, ປະສານຈິດໃຈປະຊາຊົນໃຫ້ໃກ້ຊິດກັນ, ບູລະນະພື້ນຖານແຫ່ງຈິດໃຈປະຊາຊົນໃຫ້ໝັ້ນຄົງ, ອົບຮົມກຳລັງອັນຕັ້ງໜ້າທີ່ຊຸກຍູ້ການຂະຫຍາຍສາຍພົວພັນສອງປະເທດນັ້ນໃຫ້ເຂັ້ມແຂງຂຶ້ນ.

    ທ່ານ ຊິນໂຈະ ອາເບະ ກ່າວວ່າ, ການຢ້ຽມຢາມຂອງທ່ານ ຫຼີເຄີ້ສຽງ ຄັ້ງນີ້ ໄດ້ບັນລຸໃຫ້ສາຍພົວພັນສອງປະເທດກັບຄືນສູ່ເສັ້ນທາງປົກກະຕິ ເຊິ່ງເປັນຈຸດເລີ່ມຕົ້ນໃໝ່. ສອງຝ່າຍມີໜ້າທີ່ປ່ຽນການຂັດແຍ້ງໃຫ້ເປັນການປະສານງານ, ເລີ່ມແຕ່ມື້ນີ້ເປັນຕົ້ນໄປ ຈະເຂົ້າສູ່ສະໄໝປະສານງານ. ຂໍພຽງແຕ່ວ່າສອງຝ່າຍເກາະແຂນກັນກ້າວໄປໜ້າ, ກໍບໍ່ມີຄວາມຫຍຸ້ງຍາກໃດໆທີ່ຈະຜ່ານຜ່າບໍ່ໄດ້.