ທ່ານ ມາຮາເທຍ ສາບານຕົວຂຶ້ນຮັບຕຳແໜ່ງນາຍົກລັດຖະມົນຕີມາເລເຊຍ

ຕອນຄ່ຳວັນທີ 10 ພຶດສະພານີ້ ຢູ່ພະລາຊະວັງແຫ່ງຊາດ, ທ່ານ ມາຮາເທຍ ມູຮາມັດ ອະດີດນາຍົກລັດຖະມົນຕີທີ່ຫາກໍນຳພາພັກຝ່າຍຄ້ານເອົາຊະນະໃນການເລືອກຕັ້ງໃຫຍ່ມາເລເຊຍນັ້ນ ໄດ້ສາບານຕົວຂຶ້ນຮັບຕຳແໜ່ງນາຍົກລັດຖະມົນຕີອີກເທື່ອໜຶ່ງພາຍຫຼັງ 15 ປີແລ້ວ. ການທີ່ມີອາຍຸ 92 ປີນັ້ນ ເຮັດໃຫ້ທ່ານກາຍເປັນຫົວໜ້າລັດຖະບານທີ່ອາຍຸສູງສຸດໃນໂລກປັດຈຸບັນ.

ທ່ານ ມາຮາເທຍ ເຄີຍດຳລົງຕຳແໜ່ງນາຍົກລັດຖະມົນຕີເປັນເວລາ 22 ປີຄືແຕ່ປີ 1981-2003, ເຊິ່ງເປັນນາຍົກລັດຖະມົນຕີທີ່ດຳລົງຕຳແໜ່ງເປັນເວລາຍາວທີ່ສຸດຂອງມາເລເຊຍ. ໃນໄລຍະເປັນນາຍົກລັດຖະມົນຕີ, ທ່ານໄດ້ສຸມໃສ່ພັດທະນາເສດຖະກິດແລະການສ້າງສາທີ່ທັນສະໄໝຂອງຊາດ ເຊິ່ງໄດ້ຖືກຍອມຮັບແລະເຄົາລົບຈາກຊາວມາເລເຊຍຢ່າງຫຼວງຫຼາຍ.