ພິທີເລີ່ມໂຄງການຮ່ວມມືດ້ານຊີວິດການເປັນຢູ່ຂອງປະຊາຊົນລະຫວ່າງຈີນ-ກຳປູເຈຍໄດ້ຈັດຂຶ້ນຢູ່ເຂດບາຕີແຂວງຕາແກ້ວແລະເຂດເປຣຊານະຄອນພະນົມເປັນຂອງກຳປູເຈຍໃນວັນທີ 10 ແລະວັນທີ 11 ພຶດສະພານີ້ຕາມລຳດັບ.
ທ່ານອຸຈ ເພຍ ເຈົ້າແຂວງແຂວງຕາແກ້ວຂອງກຳປູເຈຍໄດ້ສະແດງຄວາມຂອບໃຈຢ່າງສຸດອົກສຸດໃຈຕໍ່ຄວາມຊ່ວຍເຫຼືອຈາກອົງການຈັດຕັ້ງສັງຄົມຂອງຈີນ. ທ່ານກ່າວວ່າ: ອົງການຈັດຕັ້ງສັງຄົມຂອງຈີນດຳເນີນໂຄງການຮ່ວມມືດ້ານຊີວິດການເປັນຢູ່ຂອງປະຊາຊົນຢູ່ກຳປູເຈຍ, ຈະເສີມຂະຫຍາຍບົດບາດອັນຕັ້ງໜ້າຕໍ່ການປັບປຸງຊີວິດການເປັນຢູ່ຂອງປະຊາຊົນກຳປູເຈຍໃຫ້ດີຂຶ້ນ.
ທ່ານຫຼີວໄຂຢາງ ຮອງຫົວໜ້າເລຂາທິການສະມາຄົມສົ່ງເສີມການແລກປ່ຽນລະຫວ່າງຊາດຂອງອົງການຈັດຕັ້ງພົນລະເຮືອນຈີນກ່າວວ່າ: ເທື່ອນີ້ອົງການຈັດຕັ້ງພົນລະເຮືອນຈີນແລະກຳປູເຈຍໄດ້ເລີ່ມດຳເນີນ 5 ໂຄງການ, ຄ່າໃຊ້ຈ່າຍທັງໝົດໃນໂຄງການລ້ວນແຕ່ມາຈາກການບໍລິຈາກຂອງບຸກຄົນໃຈບຸນແລະວິສາຫະກິດຈີນ, ທັງນີ້ກໍ່ໄດ້ສະແດງໃຫ້ເຫັນຄວາມຮັກແພງແລະຄວາມອວຍພອນອັນດີງາມຂອງປະຊາຊົນຈີນທີ່ມີຕໍ່ປະຊາຊົນກຳປູເຈຍ.
ຜ່ານຈາກ 5 ໂຄງການຮ່ວມມືດັ່ງກ່າວ, ໄດ້ຊ່ວຍແກ້ໄຂບັນຫານ້ຳດື່ມຂອງຫຼາຍໝື່ນຄອບຄົວ, ເຮັດໃຫ້ນັກຮຽນປະຖົມມີເຄື່ອງໃຊ້ໃນການຮຽນ, ໄດ້ແກ້ໄຂບັນຫານຳໃຊ້ໄຟຟ້າຂອງປະຊາຊົນທ້ອງຖິ່ນ.
ວັນທີ 11 ພຶດສະພານີ້, ສະມາຄົມສົ່ງເສີມການແລກປ່ຽນລະຫວ່າງຊາດຂອງອົງການຈັດຕັ້ງພົນລະເຮືອນຈີນກັບເວທີປຶກສາຫາລືສະຫະພັນອົງການຈັດຕັ້ງສັງຄົມພົນລະເຮືອນກຳປູເຈຍໄດ້ຮ່ວມກັນຈັດພິທີເຊັນສັນຍາໂຄງການຮ່ວມມືແລະແລກປ່ຽນດ້ານຊີວິດການເປັນຢູ່ຂອງອົງການຈັດຕັ້ງພົນລະເຮືອນຈີນ-ກຳປູເຈຍຢູ່ພະນົມເປັນ. ອົງການຈັດຕັ້ງສັງຄົມຈີນ 10 ແຫ່ງເຊິ່ງລວມທັງກອງທຶນການພັດທະນາໂດຍສັນຕິຂອງຈີນໄດ້ເຊັນສັນຍາຮ່ວມມືຫຼືບົດບັນທຶກຊ່ວຍຈຳ 11 ສະບັບກັບເວທີປຶກສາຫາລືສະຫະພັນອົງການຈັດຕັ້ງສັງຄົມພົນລະເຮືອນກຳປູເຈຍ ເຊິ່ງມີເນື້ອໃນກ່ຽວພັນເຖິງຊີວິດການເປັນຢູ່ຂອງປະຊາຊົນໂດຍພື້ນຖານ ການປິ່ນປົວ ການສຶກສາ ການອະນຸລັກສິ່ງແວດລ້ອມ ການປົກປ້ອງເດັກນ້ອຍ ການແລກປ່ຽນດ້ານອາສາສະໝັກແລະຂົງເຂດອື່ນໆ.
 |
