ວັນທີ 12 ພຶດສະພານີ້, ກອງປະຊຸມສາກົນກ່ຽວກັບໄພແຜ່ນດິນໄຫວທີ່ເກີດຂຶ້ນຢູ່ເຂດເວີ້ນຊ່ວນແຂວງເສສວນຈີນຄົບຮອບ 10 ປີ ກໍຄືກອງປະຊຸມສຳມະນາສາກົນກ່ຽວກັບໄພແຜ່ນດິນໄຫວຢູ່ແຜ່ນດິນໃຫຍ່ຄັ້ງທີ 4 ໄດ້ໄຂຂຶ້ນຢູ່ນະຄອນເສີງຕູແຂວງເສສວນຂອງຈີນ, ທ່ານສີ ຈິ້ນ ຜິງ, ປະທານປະເທດຈີນໄດ້ສົ່ງສານໄປຍັງງານສຳມະນາຄັ້ງນີ້.
ທ່ານສີ ຈິ້ນ ຜິງຊີ້ອອກວ່າ, ປີນີ້ແມ່ນປີທີ່ເກີດໄພແຜ່ນດິນໄຫວເວີ້ນຊ່ວນຄົບຮອບ 10 ປີ. ພາຍໃຕ້ການນຳພາຢ່າງເຂັ້ມແຂງຂອງພັກກອມມູນິດຈີນ, ວຽກງານສ້າງບ້ານແປງເມືອງຄືນໃໝ່ຢູ່ເຂດປະສົບໄພແຜ່ນດິນໄຫວເວີ້ນຊ່ວນໄດ້ຮັບຜົນສຳເລັດທີ່ປະຈັກຕາຊາວໂລກ, ເຊິ່ງໄດ້ສະໜອງປະສົບການແລະແນວຄິດທີ່ດີໃຫ້ແກ່ປະຊາຄົມໂລກໃນການດຳເນີນການສ້າງບ້ານແປງເມືອງຄືນໃໝ່ພາຍຫຼັງໄດ້ເກີດໄພທຳມະຊາດ.
ທ່ານນສີ ຈິ້ນ ຜິງຍັງກ່າວເນັ້ນວ່າ, ການຊອກຮູ້ກົດເກນທີ່ພາໃຫ້ເກີດໄພທຳມະຊາດດ້ວຍສາຍຕາວິທະຍາສາດ, ຫຼຸດຄວາມສ່ຽງຂອງໄພທຳມະຊາດໃຫ້ໜ້ອຍລົງຢ່າງບັງເກີດຜົນ, ເຮັດໃຫ້ມວນມະນຸດກັບທຳມະຊາດຢູ່ນຳກັນຢ່າງກົມກຽວກັນ, ຕ້ອງການຄວາມພະຍາຍາມຮ່ວມຂອງປະຊາຄົມໂລກ. ຈີນຈະຍຶດໝັ້ນແນວຄິດການພັດທະນາທີ່ຖືປະຊາຊົນເປັນໃຈກາງ, ຍຶດໝັ້ນຖືການປ້ອງກັນເປັນຫຼັກ, ເຮັດໃຫ້ການປ້ອງກັນໄພ,ການຕ້ານໄພທຳມະຊາດແລະການກູ້ໄພປະສານສົມທົບກັນ, ຍົກສູງຄວາມສາມາດດ້ານການປ້ອງກັນໄພທຳມະຊາດສັງລວມຢ່າງຮອບດ້ານ, ສະໜອງການຮັບປະກັນຢ່າງໜັກແໜ້ນໃຫ້ແກ່ຄວາມປອດໄພທັງຊີວິດແລະຊັບສິນຂອງປະຊາຊົນ.
 |
