ຕາມຂ່າວCRI：ວັນທີ 11 ພຶດສະພານີ້, ກະຊວງການຕ່າງປະເທດສິງກະໂປໄດ້ອອກຖະແຫຼງການວ່າ, ທ່ານ ຫຼີ ສຽນ ລູງ, ນາຍົກລັດຖະມົນຕີສິງກະໂປໄດ້ໂອ້ລົມກັນທາງໂທລະສັບກັບທ່ານໂດນັນ ທຣຳ, ປະທານາທິບໍດີອາເມລິກາໃນມື້ດຽວກັນ, ກ່າວວ່າສິງກະໂປຈະພະຍາຍາມສຸດຂີດເພື່ອຮັບປະກັນໃຫ້ການພົບປະລະຫວ່າງຜູ້ນຳອາເມລິາກັບ ສ.ປ.ປ ເກົາຫຼີຈັດຂຶ້ນຢູ່ສິງກະໂປໃນກາງເດືອນມິຖຸນາໜ້ານີ້ຢ່າງມີຜົນສຳເລັດ.
ທ່ານຫຼີ ສຽນ ລູງ ກ່າວໃນເວລາໂອ້ລົມກັນທາງໂທລະສັບວ່າ, ທ່ານຍິນດີຕ້ອນຮັບທ່ານໂດນັນ ທຣຳເດີນທາງມາສິງກະໂປເພື່ອເຂົ້າຮ່ວມການພົບປະລະຫວ່າງຜູ້ນຳອາເມລິກາກັບ ສ.ປ.ປ ເກົາຫຼີທີ່ຈະຈັດຂຶ້ນໃນໄວໆນີ້. ການພົບປະຄັ້ງນີ້ຈະແມ່ນເຫດການສຳຄັນທີ່ມີລັກສະນະປະຫວັດສາດຄັ້ງໜຶ່ງ. ສິງກະໂປຮູ້ສຶກເປັນກຽດຢ່າງຍິ່ງທີ່ມີໂອກາດເປັນເຈົ້າພາບຂອງການພົບປະຄັ້ງນີ້, ແລະຈະພະຍາຍາມຢ່າງສຸດຂີດເພື່ອຮັບປະກັນໃຫ້ການພົບປະຈັດຂຶ້ນຢ່າງສະດວກແລະສຳເລັດຜົນ.
ນອກນີ້, ທ່ານໄມຄ ໂປມເປວ, ລັດຖະມົນຕີກະຊວງການຕ່າງປະເທດອາເມລິກາກ່າວໃນວັນທີ 11 ພຶດສະພານີ້ວ່າ, ຖ້າວ່າ ສ.ປ.ປ ເກົາຫຼີຢວງບາດກ້າວຢ່າງກ້າຫານ, ບັນລຸການປອດນິວເຄຼຍໂດຍໄວ, ອາເມລິກາໄດ້ກຽມພ້ອມເພື່ອຊ່ວຍເຫຼືອໃຫ້ ສ.ປ.ປ ເກົາຫຼີກ້າວເຂົ້າສູ່ຄວາມຈະເລີນຮຸ່ງເຮືອງ. ທ່ານໄມຄ ໂປມເປວເປີດເຜີຍວ່າ, ໃນເວລາໄປຢ້ຽມຢາມ ສ.ປ.ປ ເກົາຫຼີໃນຫວ່າງກ່ອນນີ້ບໍ່ດົນ, ທ່ານໄດ້ດຳເນີນການສົນທະນາທີ່ມີລັກສະນະທາດແທ້ກັບທ່ານ ກິມ ເຈິງ ອຸນ, ຜູ້ນຳສູງສຸດຂອງ ສ.ປ.ປ ເກົາຫຼີກ່ຽວກັບບັນຫາທີ່ເລິກເຊິ່ງແລະສັບສົນແລະໄດ້ຮັບປະສິດທິຜົນສູງ.
ທ່ານໂດນັນ ທຣຳ, ປະທານາທິບໍດີອາເມລິກາເປີດເຜີຍໃນວັນທີ 10 ພຶດສະພານີ້ວ່າຈະພົບປະກັບທ່ານກິມ ເຈິງ ອຸນ, ຜູ້ນຳສູງສຸດຂອງ ສ.ປ.ປ ເກົາຫຼີຢູ່ສິງກະໂປໃນວັນທີ 12 ມິຖຸນາໜ້ານີ້.
 |
