ຕອນເຊົ້າວັນທີ 11 ພຶດສະພານີ້ຕາມເວລາທ້ອງຖິ່ນ, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ເຂົ້າຮ່ວມພິທີເປີດເວທີປຶກສາຫາລືເຈົ້າແຂວງຈີນຍີ່ປຸ່ນ ທີ່ຈັດຂຶ້ນຢູ່ໂຮງແຮມທີ່ທ່ານພັກຢູ່ເມືອງຊາໂພໂຣແຂວງໂຮຄາຍໂດຍີ່ປຸ່ນ ພ້ອມທັງກ່າວຄຳປາໄສ.
ທ່ານຫຼີເຄີ້ສຽງກ່າວວ່າ, ຈີນກັບຍີ່ປຸ່ນແມ່ນປະເທດບ້ານໃກ້ເຮືອນຄຽງທີ່ສຳຄັນຂອງກັນ, ການພົວພັນລະຫວ່າງຈີນກັບຍີ່ປຸ່ນຂະຫຍາຍຕົວຢ່າງປອດໄສແລະໝັ້ນທ່ຽງ ສອດຄ່ອງກັບຜົນປະໂຫຍດພື້ນຖານຂອງສອງປະເທດກໍ່ຄືປະຊາຊົນສອງຊາດ, ແລະມີຜົນດີຕໍ່ສັນຕິພາບສະຖຽນລະພາບແລະຄວາມຈະເລີນຮຸ່ງເຮືອງຂອງພາກພື້ນກໍ່ຄືຂອງໂລກ. ສອງຝ່າຍຄວນກຳແໜ້ນທິດທາງສັນຕິພາບ ມິດຕະພາບແລະການຮ່ວມມື, ຂະຫຍາຍການຮ່ວມມືທີ່ມີໄມຕີຈິດມິດຕະພາບຖານບ້ານໃກ້ເຮືອນຄຽງທີ່ດີຕໍ່ກັນລະຫວ່າງສອງປະເທດ. ປີນີ້ແມ່ນປີທີ່ຈີນກັບຍີ່ປຸ່ນເຊັນສັນຍາສົນທິສັນຕິພາບແລະມິດຕະພາບຄົບຮອບ 40 ປີ, ສອງຝ່າຍຄວນຫວນຄືນຈິດໃຈຂອງສັນຍາ, ປັບປຸງພື້ນຖານການເມືອງໃຫ້ໝັ້ນຄົງກວ່າເກົ່າ, ຂະຫຍາຍການຮ່ວມມືທີ່ມີໄມຕີຈິດມິດຕະພາບ, ຊຸກຍູ້ໃຫ້ການພົວພັນລະຫວ່າງສອງປະເທດກັບຄືນສູ່ວົງໂຄຈອນທີ່ເປັນປົກກະຕິ, ໄດ້ຮັບການພັດທະນາໃໝ່ແລະຂະຫຍາຍຕົວຢ່າງໝັ້ນທ່ຽງແລະຍາວໄກ.
ທ່ານຫຼີເຄີ້ສຽງຍັງອອກວ່າ, ການແລກປ່ຽນແລະການຮ່ວມມືລະຫວ່າງທ້ອງຖິ່ນຕ່າງໆ ແມ່ນພາກສ່ວນປະກອບທີ່ສຳຄັນໃນການພົວພັນລະຫວ່າງຈີນກັບຍີ່ປຸ່ນ, ກໍ່ແມ່ນຊ່ອງທາງສຳຄັນທີ່ຊຸກຍູ້ໄມຕີຈິດມິດຕະພາບລະຫວ່າງພົນລະເຮືອນສອງປະເທດ. ໃນໄລຍະຢ້ຽມຢາມ, ລັດຖະບານສອງປະເທດຈີນຍີ່ປຸ່ນໄດ້ເຊັນສັນຍາຮ່ວມມືຫຼາຍສະບັບ, ເຊິ່ງໄດ້ສ້າງເງື່ອນໄຂແລະຊ່ອງຫວ່າງໃຫ້ທ້ອງຖິ່ນແລະວິສາຫະກິດສອງປະເທດໃນການລົງເລິກການຮ່ວມມື.
ຕອນບ່າຍວັນທີ 11 ພຶດສະພານີ້ຕາມເວລາປັກກິ່ງ, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ພາຍຫຼັງໄດ້ກັບຄືນນະຄອນຫຼວງປັກກິ່ງດ້ວຍເຄື່ອງບິນພິເສດສິ້ນສຸດການຢ້ຽມຢາມຕໍ່ອິນໂດເນເຊຍຢ່າງເປັນທາງການ, ເຂົ້າຮ່ວມກອງປະຊຸມຜູ້ນຳຈີນ ຍີ່ປຸ່ນ ສ.ເກົາຫຼີ ຄັ້ງທີ 7 ແລະຢ້ຽມຢາມຍີ່ປຸ່ນຢ່າງເປັນທາງການ.
 |
