ການໂຈມຕີດ້ວຍມີດທີ່ເກີດຂຶ້ນຢູ່ປາຣີ ນະຄອນຫຼວງຝຣັ່ງໃນຕອນຄ່ຳວັນທີ 12 ພຶດສະພານີ້ໄດ້ເຮັດໃຫ້ 2 ຄົນເສຍຊີວິດເຊິ່ງລວມທັງຜູ່ໂຈມຕີ, ອີກ 4 ຄົນໄດ້ຮັບບາດເຈັບ, ກຸ່ມ IS ເຊິ່ງເປັນອົງການກຸ່ມຫົວຮຸນແຮງປະກາດວ່າໄດ້ກໍ່ການໂຈມຕີເທື່ອນີ້.
ຕອນກາງຄືນວັນທີ 12 ພຶດສະພານີ້, ທ່ານຟຣັງຊົວ ໂມລິນ ເຈົ້າໜ້າທີ່ໄອຍະການປາຣີໄດ້ຈັດງານຖະແຫຼງຂ່າວຢູ່ສະຖານທີ່ເກີດເຫດໂຈມຕີວ່າ, ຜູ້ເຫັນເຫດການຫຼາຍຄົນໄດ້ຢືນຢັນວ່າຜູ້ໂຈມຕີໄດ້ຮ້ອງຄຳຂວັນສາສະໜາໃນເວລາໂຈມຕີ, ຍ້ອນພິຈາລະນາເຖິງຮູບການກໍ່ເຫດຂອງຜູ້ໂຈມຕີ, ພາກສ່ວນຕ້ານການກໍ່ການຮ້າຍຂອງອົງການໄອຍະການປາຣີໄດ້ເລີ່ມດຳເນີນການສືບສວນ.
ສື່ມວນຊົນຝຣັ່ງລາຍງານວ່າ, ກຸ່ມຫົວຮຸນແຮງ IS ປະກາດວ່າໄດ້ກໍ່ການໂຈມຕີເທື່ອນີ້, ແຕ່ຍັງບໍ່ທັນຢືນຢັນຖານະລະອຽດຂອງຜູ້ໂຈມຕີເທື່ອ.
ຕອນຄ່ຳວັນທີ 12 ພຶດສະພານີ້, ທ່ານເອມານູນ ມາກຣົງ ປະທານາທິບໍດີຝຣັ່ງໄດ້ສະແດງຄວາມເຫັນໃຈແລະຄວາມໄວ້ອາໄລຕໍ່ຜູ້ປະສົບເຄາະຮ້າຍໃນການໂຈມຕີເທື່ອນີ້ໂດຍຜ່ານ twitter ຂອງຕົນ , ແລະສະແດງຄວາມເຄົາລົບນັບຖືຕໍ່ຕຳຫຼວດທີ່ຍິງຜູ້ໂຈມຕີຕາຍ.
