ຂ່າວສານຈີນລາຍງານວ່າ: ກອງປະຊຸມເວທີປຶກສາຫາລືອາຊີເພື່ອທ້ອນໂຮມຈີນເປັນເອກະພາບໂດຍສັນຕິຄັ້ງທີ 6 ໄດ້ຈັດຂຶ້ນຢູ່ນະຄອນຫຼວງມານີລາຂອງຟີລິບປິນໃນວັນທີ 12 ພຶດສະພານີ້ ໂດຍການເປັນເຈົ້າພາບຂອງສະມາຄົມສົ່ງເສີມການທ້ອນໂຮມຈີນເປັນເອກະພາບໂດຍສັນຕິຟີລິບປິນ ແລະຜູ້ຕາງໜ້າຈາກແຜ່ນດິນໃຫຍ່ຈີນ, ໄຕ້ຫວັນ,ຮົງກົງຈີນພ້ອມດ່ວຍປະເທດແລະເຂດແຄວ້ນອື່ນໆ ແລະຊາວຈີນຕ່າງດ້າວຟີລິບປິນ 700 ກວ່າທ່ານເຂົ້າຮ່ວມ.
ທ່ານຖານສິງເຊິ່ງ ທີ່ປຶກສາຂອງສະຖານທູດຈີນປະຈຳຟີລິບປິນໄດ້ປະກອບຄຳເຫັນໃນພິທີເປີດກອງປະຊຸມວ່າ: ອົງການຈັດຕັ້ງສັງຄົມຊາວຈີນຕ່າງດ້າວຟີລິບປິນໂດຍມີສະມາຄົມສົ່ງເສີມການທ້ອນໂຮມຈີນເປັນເອກະພາບໂດຍສັນຕິຟີລິບປິນເປັນຜູ້ຕາງໜ້ານັ້ນໄດ້ສາມັກຄີແລະທ້ອນໂຮມກຳລັງຊາວຈີນຕ່າງດ້າວຟີລິບປິນຢ່າງຫຼວງຫຼາຍ,ຕັ້ງໜ້າໂຄສະນາແນວຄິດທ້ອນໂຮມປະເທດຊາດເປັນເອກະພາບໂດຍສັນຕິ, ເດັດດ່ຽວຕໍ່ສູ້ກັບອິດທິກຳລັງແບ່ງແຍກໄຕ້ຫວັນໃຫ້ເປັນເອກະລາດກໍຄືການເຄື່ອນໄຫວກ່ຽວຂ້ອງນັ້ນ ເປັນແນວຮົບເຂັ້ມແຂງເພື່ອຕໍ່ຕ້ານການແບ່ງແຍກໄຕ້ຫວັນໃຫ້ເປັນເອກະລາດເພື່ອສົ່ງເສີມການທ້ອນໂຮມປະເທດຊາດເປັນເອກະພາບໂດຍສັນຕິຢູ່ຕ່າງປະເທດ.
ທ່ານຢວີ້ສ່ວນຫູ ຫົວໜ້າຫ້ອງການຄົ້ນຄວ້າຂອງສະມາຄົມສົ່ງເສີມການທ້ອນໂຮມປະເທດຊາດເປັນເອກະພາບໂດຍສັນຕິໄດ້ປະກອບຄຳເຫັນວ່າ: ເວທີປຶກສາຫາລືອາຊີເປັນໜຶ່ງໃນກິດຈະກຳທີ່ມີຊື່ສຽງແລະມີຊີວິດຊີວາກວ່າໝູ່ໃນຂະບວນການຊາວຈີນຕ່າງດ້າວທົ່ວໂລກຕໍ່ຕ້ານການແບ່ງແຍກໄຕ້ຫວັນເປັນເອກະລາດແລະສົ່ງເສີມການທ້ອນໂຮມປະເທດຊາດເປັນເອກະພາບໂດຍສັນຕິ ເຊິ່ງໄດ້ກາຍເປັນຂົວຕໍ່ສຳຄັນໃນການເຊື່ອຕໍ່ສະມາຄົມສົ່ງເສີມການທ້ອນໂຮມປະເທດຊາດເປັນເອກະພາບໂດຍສັນຕິພ້ອມດ້ວຍອົງການຈັດຕັ້ງກ່ຽວຂ້ອງໃນບັນດາປະເທດອາຊີ, ກາຍເປັນເວທີສຳຄັນແຫ່ງການແລກປ່ຽນແນວຄິດທ້ອນໂຮມຄວາມເປັນເອກະພາບກັນຂອງຜູ້ມີອຸດົມການສູງສົ່ງຂອງ ໄຕ້ຫວັນ,ຮົງກົງ,ມາກາວກໍຄືຕ່າງປະເທດ, ເປັນເວທີສຳຄັນໃນການຊຸກຍູ້ການຂະຫຍາຍຕົວຂອງຂະບວນການຊາວຈີນຕ່າງດ້າວຕໍ່ຕ້ານການແບ່ງແຍກໄຕ້ຫວັນເປັນເອກະລາດແລະສົ່ງເສີມການທ້ອນໂຮມປະເທດຊາດເປັນເອກະພາບໂດຍສັນຕິ.
