ພິທີສະຫຼອງວັນສ້າງຕັ້ງສະມາຄົມມິດຕະພາບມຽນມາ-ຈີນຄົບຮອບ 5 ປີໄດ້ຈັດຂຶ້ນຢູ່ນະຄອນຢາງກຸງໃນວັນທີ 13 ພຶດສະພານີ້. ທ່ານຊຽນວິນອອງ ປະທານສະມາຄົມດັ່ງກ່າວກ່າວວ່າ, ສະມາຄົມຈະສືບຕໍ່ພະຍາຍາມ ເພື່ອເພີ່ມທະວີການແລກປ່ຽນດ້ານວັດທະນະທຳລະຫວ່າງສອງປະເທດ ແລະ ຮັດແໜ້ນການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດ.
ທ່ານຊຽນວິນອອງກ່າວວ່າ, ມຽນມາ ແລະ ຈີນບໍ່ພຽງແຕ່ມີສາຍພູ ແລະ ແມ່ນ້ຳຕິດຈອດກັນເທົ່ານັ້ນ, ຍັງມີມູນເຊື້ອມິດຕະພາບມາແຕ່ດົນນານ. ພາຍຫຼັງສະມາຄົມມິດຕະພາບມຽນມາ-ຈີນສ້າງຕັ້ງຂຶ້ນມານີ້, ໄດ້ມີການປະກອບສ່ວນຕໍ່ການແລກປ່ຽນລະຫວ່າງສອງປະເທດໃນຫຼາຍດ້ານ ແລະ ຈະສືບຕໍ່ພະຍາຍາມ ເພື່ອຊຸກຍູ້ການແລກປ່ຽນ ແລະ ຮ່ວມມືລະຫວ່າງມຽນມາກັບປະເທດອ້ອມຂ້າງ.
ທ່ານຊຽນວິນອອງກ່າວຕື່ມວ່າ, ມຽນມາມີຄວາມຕ້ອງການເຂົ້າຮ່ວມການສ້າງຂໍ້ລິເລີ່ມ "ໜຶ່ງແລວໜຶ່ງເສັ້ນທາງ" ທີ່ສາມາດສ້າງຄວາມຈະເລີນຮຸ່ງເຮືອງໃຫ້ແກ່ປະເທດ, ພາກພື້ນ ກໍຄືໂລກ. ຕໍ່ໄປພາຍໜ້າ, ສະມາຄົມຕົນຈະສືບຕໍ່ປະກອບສ່ວນ ເພື່ອຊຸກຍູ້ການຮ່ວມມືໃນຂົງເຂດເສດຖະກິດ, ສັງຄົມ, ສາທາລະນະສຸກ, ການສຶກສາ ແລະອື່ນໆ ລະຫວ່າງສອງປະເທດ, ພ້ອມທັງອອກແຮງສືບທອດມູນເຊື້ອມິດຕະພາບມຽນມາ-ຈີນ, ອົບຮົມບົ່ມສ້າງຊາວໜຸ່ມຜູ້ມີຄວາມຮູ້ຄວາມສາມາດ ແລະ ອື່ນໆ.
 |
