ວັນທີ 14 ມິຖຸນານີ້,ທ່ານລູ້ຄ່າງ ໂຄສົກກະຊວງການຕ່າງປະເທດຈີນຢືນຢັນວ່າ,ຈີນໃຫ້ຄວາມສົນໃຈເປັນຢ່າງຍິ່ງຕໍ່ການຍິງປະທະກັນທີ່ເກີດຂຶ້ນຢູ່ເຂດພາກເໜືອມຽນມາໃນວັນທີ 12 ພຶດສະພານີ້. ມາຮອດປັດຈຸບັນ, ເຫດການດັ່ງກ່າວໄດ້ເຮັດໃຫ້ຊາວຈີນສອງຄົນທີ່ອາໃສຢູ່ມຽນມາເສຍຊີວິດ ທັງມີຈະຫຼວດ 3 ລູກແລະລູກປືນຈຳນວນໜຶ່ງຕົກລົງດິນແດນຈີນ. ຈີນໄດ້ຕໍ່ວ່າທັກທ້ວງຢ່າງໜັກໜ່ວງຕໍ່ຝ່າຍທີ່ກ່ຽວຂ້ອງຂອງມຽນມາໂດຍຮຽກຮ້ອງໃຫ້ບັນດາຝ່າຍທີ່ປະທະກັນຢຸດຍິງໃນທັນທີ ແລະໃຊ້ທຸກມາດຕະການເພື່ອປ້ອງກັນບໍ່ໃຫ້ເຫດປະທະກັນນີ້ແຜ່ຂະຫຍາຍກວ້າງອອກ ແລະຟື້ນຟູຄວາມສະຫງົບຂອງເຂດຊາຍແດນຈີນ-ມຽນມາໂດຍໄວ ທັງຫຼີກເວັ້ນບໍ່ໃຫ້ເກີດເຫດທຳລາຍສັນຕິພາບແລະສະຖຽນລະພາບຂອງເຂດຊາຍແດນສອງປະເທດອີກຢ່າງເດັດຂາດ.
ທ່ານລູ້ຄ່າງກ່າວວ່າ: ການທີ່ປຶກສາຫາລືກັນແລະຊຸກຍູ້ຂະບວນການສັນຕິພາບດ້ວຍນະໂຍບາຍຮອບດ້ານກວມລວມນັ້ນເປັນຫຼັກການທີ່ບັນດາຝ່າຍຂອງມຽນມາຄວນປະຕິບັດ ທັງເປັນວິທີພຽງໜຶ່ງດຽວທີ່ສາມາດປະຕິບັດໄດ້ເພື່ອບັນລຸຄວາມປອງດອງແລະສັນຕິພາບ. ຈີນເລັ່ງທວງໃຫ້ບັນດາຝ່າຍທີ່ກ່ຽວຂ້ອງຂອງມຽນມາປະຕິບັດຕາມຫຼັກການນີ້, ເຈລະຈາກັນເພື່ອມຸ່ງໜ້າສູ່ເປົ້າໝາຍດຽວກັນ, ແກ້ໄຂຄວາມຂັດແຍ້ງໃຫ້ເໝາະສົມ, ເພີ່ມຄວາມໄວ້ເນື້ອເຊື່ອໃຈກັນ ແລະພະຍາຍາມໃຫ້ຫຼາຍເທົ່າທີ່ຄວນເພື່ອຊຸກຍູ້ຂະບວນການສັນຕິພາບ.
 |
