ກອງປະຊຸມປະຈຳປີຂອງຄະນະກຳມະການສັງຄົມເສດຖະກິດອາຊີປາຊີຟິກຂອງອົງການສະຫະປະຊາຊາດຫຼື UN ESCAP ຄັ້ງທີ 74 ໄຂຂຶ້ນຢູ່ນະຄອນຫຼວງບາງກອກປະເທດໄທໃນວັນທີ 14 ພຶດສະພານີ້. ທ່ານ ຊຳຊັດ ອັກຕາ ເລຂາບໍລິຫານງານຂອງ UN ESCAP ໄດ້ກ່າວຄຳປາໄສໃນພິທີ ເຊິ່ງທ່ານໄດ້ຕີລາຄາສູງຕໍ່ຄວາມໝາຍສຳຄັນຂອງຂໍ້ລິເລີ່ມ"ໜຶ່ງແລວໜຶ່ງເສັ້ນທາງ"ຕໍ່ພາກພື້ນແລະທົ່ວໂລກ.
ທ່ານ ຊຳຊັດ ອັກຕາ ກ່າວວ່າ, ປັດຈຸບັນ, ພາຍໃຕ້ສະພາບກະແສຕ້ານໂລກາພິວັດ ແລະ ລັດທິປົກປ້ອງການຄ້າ, ໄດ້ເພີ່ມຄວາມບໍ່ແນ່ນອນຂອງການເຕີບໂຕຂອງເສດຖະກິດໂລກ, ຖ້າຝືນດຳເນີນຕໍ່ໄປ ຈະມີຜົນກະທົບຕໍ່ຕ່ອງໂສ້ການຕອບສະໜອງຂອງໂລກແລະບັນດາປະເທດອາຊີປາຊີຟິກຢ່າງໜັກໜ່ວງ. ບັນດາປະເທດອາຊີປາຊີຟິກຄວນຮ່ວມກັນຮັບມືກັບສິ່ງທ້າທາຍ,ເສີມຂະຫຍາຍບົດບາດນຳພາໃນການປົກປັກຮັກສາແລະຊຸກຍູ້ການຄຸ້ມຄອງໂລກແລະລະບົບຫຼາຍຝ່າຍຢ່າງມີຄວາມຍຸດຕິທຳ.
ທ່ານ ອັກຕາ ເຫັນວ່າ,ເສດຖະກິດພາກພື້ນເຊື່ອມໂຍງເຂົ້າກັນແມ່ນທ່າແຮງທີ່ສຳຄັນໃນການພັດທະນາຂອງອາຊີປາຊີຟິກ. ຂໍ້ລິເລີ່ມ"ໜຶ່ງແລວໜຶ່ງເສັ້ນທາງ"ທີ່ທ່ານ ສີຈິ້ນຜິງ ປະທານປະເທດຈີນສະເໜີມີຄວາມໝາຍສຳຄັນແລະໃຫຍ່ຫຼວງ,ຈະເສີມຂະຫຍາຍບົດບາດທີ່ສຳຄັນໃນການຊຸກຍູ້ເສດຖະກິດພາກພື້ນໃຫ້ເຊື່ອມໂຍງເຂົ້າກັນແລະເພີ່ມທະວີການເຊື່ອມຈອດກັນຂອງພາກພື້ນເປັນຕົ້ນ,ນອກນີ້,ຍັງເພີ່ມພະລັງແຮງທີ່ເຂັ້ມແຂງເຂົ້າໃນການພັດທະນາພາກພື້ນອາຊີປາຊີຟິກຢ່າງຕໍ່ເນື່ອງອີກດ້ວຍ.
 |
