ຕອນເຊົ້າວັນທີ 15 ພຶດສະພານີ້, ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດ ຈີນ, ປະທານປະເທດ, ປະທານຄະນະກຳມະການການທະຫານສູນກາງ,ປະທານຄະນະກຳມະການວຽກງານການຕ່າງປະເທດສູນກາງພັກກອມມູນິດຈີນໄດ້ເປັນປະທານກອງປະຊຸມເທື່ອທຳອິດຂອງຄະນະກຳມະການວຽກງານການຕ່າງປະເທດສູນກາງພັກກອມມູນິດຈີນແລະກ່າວປາໄສສຳຄັນໂດຍເນັ້ນວ່າ: ຕ້ອງເພີ່ມທະວີການການນຳພາລວມສູນແລະເປັນເອກະພາບກັນຂອງສູນກາງພັກຕໍ່ວຽກງານການຕ່າງປະເທດ, ກຳແໜ້ນການຜັນແປແລະຂະຫຍາຍຕົວຂອງສະພາບສາກົນໃນປັດຈຸບັນໃຫ້ຖືກຕ້ອງ, ພະຍາຍາມສ້າງສະພາບໃໝ່ຂອງວຽກງານການຕ່າງປະເທດຂອງປະເທດໃຫຍ່ທີ່ມີສີສັນພິເສດຂອງຈີນ.
ທ່ານສີຈິ້ນຜິງຊີ້ໃຫ້ເຫັນວ່າ: ໂລກປັດຈຸບັນມີປັດໄຈບໍ່ແນ່ນອນແລະບໍ່ໝັ້ນທ່ຽງເພີ່ມຫຼາຍຂຶ້ນ, ການພັດທະນາຂອງປະເທດຈີນກຳລັງຜະເຊີນ ທັງໂອກາດແລະສິ່ງທ້າທາຍໄປພ້ອມກັນ. ພວກເຮົາຕ້ອງກຳແໜ້ນກົດເກນການປ່ຽນແປງຂອງສະພາບສາກົນໃຫ້ຖືກຕ້ອງ,ໃນປັດຈຸບັນແລະໃນໄລຍະຕໍ່ໜ້າ,ຕ້ອງລົງເລິກຍຸດທະສາດການຕ່າງປະເທດ,ຈັດຕັ້ງປະຕິບັດແຜນງານການຕ່າງປະເທດສຳຄັນ, ເພີ່ມສະຕິລະວັງຕົວຕໍ່ຄວາມສ່ຽງ, ເດັດດ່ຽວປົກປັກຮັກສາອະທິປະໄຕ,ຄວາມໝັ້ນຄົງແລະຜົນປະໂຫຍດດ້ານການພັດທະນາຂອງຊາດ.
ທ່ານສີຈິ້ນຜິງເນັ້ນວ່າ: ການສ້າງ "ໜຶ່ງແລວໜຶ່ງເສັ້ນທາງ"ເປັນເວທີສຳຄັນເພື່ອຊຸກຍູ້ການສ້າງປະຊາຄົມຮ່ວມຊາຕາກຳມວນມະນຸດ. ຕ້ອງຜັນຂະຫຍາຍໝາກຜົນຂອງກອງປະຊຸມສຸດຍອດເວທີປຶກສາຫາລືການຮ່ວມມືສາກົນ "ໜຶ່ງແລວໜຶ່ງເສັ້ນທາງ"ຄັ້ງທຳອິດໃຫ້ໄດ້ຮັບປະສິດທິຜົນທີ່ດີ,ທ້ອນໂຮມຄວາມເປັນເອກະພາບກັນຂອງບັນດາຝ່າຍ, ວາງແຜນວິໄສທັດການຮ່ວມມື, ເປີດປະຕູສູ່ພາຍນອກໃຫ້ກວ້າງຂວາງກວ່າເກົ່າ,ເພີ່ມທະວີການແລກປ່ຽນ,ປຶກສາຫາລື,ການຮ່ວມມືກັບບັນດາປະເທດ,ຊຸກຍູ້ການສ້າງ "ໜຶ່ງແລວໜຶ່ງເສັ້ນທາງ"ໃຫ້ໄດ້ຮັບການປະຕິບັດຕົວຈິງຢ່າງໝັ້ນທ່ຽງຍາວນານແລະເຂົ້າສູ່ລວງເລິກ ເພື່ອສ້າງຄວາມຜາສຸກໃຫ້ແກ່ປະຊາຊົນບັນດາປະເທດຫຼາຍກວ່າເກົ່າ.
ທ່ານສີຈິ້ນຜິງເນັ້ນຕື່ມວ່າ: ຕ້ອງປະຕິບັດວຽກງານການຕ່າງປະເທດພາຍໃຕ້ສະພາບການໃໝ່ໃຫ້ໄດ້ຮັບຜົນສຳເລັດທີ່ດີ, ຄະນະກຳມະການວຽກງານການຕ່າງປະເທດສູນກາງພັກກອມມູນິດຈີນຕ້ອງເສີມຂະຫຍາຍບົດບາດໃນການສ້າງນະໂຍບາຍ, ພິຈາລະນາແລະປະສານງານ, ຊຸກຍູ້ການປະດິດສ້າງດ້ານທິດສະດີແລະພຶດຕິກຳຂອງການຕ່າງປະເທດ, ໃຫ້ການຊີ້ນຳຢ່າງເຂັ້ມແຂງເພື່ອບຸກເບີກການພັດທະນາວຽກງານການຕ່າງປະເທດໃຫ້ມີສະພາບໃໝ່ຢ່າງບໍ່ຢຸດຢັ້ງ.
ກອງປະຊຸມໄດ້ພິຈາລະນາແລະຮັບຮອງເອກະສານສຳຄັນຕ່າງໆເປັນຕົ້ນ ກົດລະບຽບ ວ່າດ້ວຍການເຄື່ອນໄຫວວຽກງານຂອງຄະນະກຳມະການວຽກງານການຕ່າງປະເທດສູນກາງພັກກອກມມູນິດຈີນ ແລະອື່ນໆ.
 |
