ວັນທີ 14 ພຶດສະພານີ້, ທ່ານມ໋າຈ່າວຊີ້ ຜູ້ຕາງໜ້າຖາວອນຂອງຈີນປະຈຳອົງການສະຫະປະຊາຊາດ ຢືນຢັນວ່າ ປະຊາຄົມໂລກຄວນພະຍາຍາມຮ່ວມກັນເພື່ອຊຸກຍູ້ມຽນມາແລະບັງກະລາເດັດປະຕິບັດສັນຍາສອງຝ່າຍໂດຍໄວເພື່ອໃຫ້ຜູ້ເສຍບ່ອນເພິ່ງພາອາໄສກັບຄືນມຽນມາ ແລະ ສ້າງສະພາບແວດລ້ອມພາຍນອກທີ່ດີໃຫ້ສອງປະເທດສາມາດແກ້ໄຂບັນຫາທີ່ເໝາະສົມໂດຍຜ່ານຊ່ອງທາງສອງຝ່າຍ.
ວັນດຽວກັນ, ທ່ານມ໋າຈ່າວຊີ້ ກ່າວໃນກອງປະຊຸມລາຍງານສະພາບກ່ຽວກັບຄະນະຜູ້ແທນສະພາຄວາມໝັ້ນຄົງອົງການສະຫະປະຊາຊາດຢ້ຽມຢາມບັງກະລາເດັດແລະມຽນມາວ່າ, ວຽກທີ່ຕ້ອງເຮັດຢ່າງຮີບດ່ວນທີ່ສຸດໃນປັດຈຸບັນກໍຄືຊຸກຍູ້ມຽນມາແລະບັງກະລາເດັດໃຫ້ມີບາດກ້າວຕົວຈິງໃນການປະຕິບັດສັນຍາສອງຝ່າຍເພື່ອເຮັດໃຫ້ຜູ້ເສຍບ່ອນເພິ່ງພາອາໄສຢູ່ບັງກະລາເດັດກັບຄືນມຽນມາໂດຍໄວໃຫ້ຫຼາຍເທົ່າທີ່ຈະຫຼາຍໄດ້ ທັງບັນເທົາສະພາບຄວາມຫຍຸ້ງຍາກດ້ານສິດທິມະນຸດຂອງເຂົາເຈົ້າຢ່າງແທ້ຈິງ.
ທ່ານມ໋າຈ່າວຊີ້ຍັງກ່າວຕື່ມວ່າ: ຈີນຈະສືບຕໍ່ເສີມຂະຫຍາຍບົດບາດທີ່ສ້າງສັນເພື່ອແກ້ໄຂບັນຫາລັດຍະໄຂ່ໃຫ້ເໝາະສົມທີ່ສຸດ.
 |
