ວັນທີ 14 ຫາວັນທີ 16 ພຶດສະພານີ້, ກອງປະຊຸມປະຈຳປີຄັ້ງທີ 74 ຂອງສະພາເສດຖະກິດແລະສັງຄົມອາຊີປາຊີຟິກໄດ້ຈັດຂຶ້ນຢູ່ນະຄອນຫຼວງບາງກອກປະເທດໄທ. ທ່ານມິຣົສລັຟ ລາຊຄາກ ປະທານສະມັດຊາໃຫຍ່ອົງການສະຫະປະຊາຊາດ, ທ່ານດອນ ປະມັດວິໄນ ລັດຖະມົນຕີກະຊວງການຕ່າງປະເທດໄທ, ແລະຜູ້ຕາງໜ້າປະເທດສະມາຊິກຕ່າງໆປະມານ 500 ທ່ານໄດ້ເຂົ້າຮ່ວມ.
ກອງປະຊຸມໄດ້ເນັ້ນຫົວຂໍ້ "ບັນຫາບໍ່ສະເໝີພາບພາຍໃຕ້ເບື້ອງຫຼັງຂະບວນການພັດທະນາແບບຍືນຍົງປີ 2030", ແລະໄດ້ດຳເນີນການປຶກສາຫາລືສະເພາະກ່ຽວກັບຫົວຂໍ້ລັດທິຫຼາຍຝ່າຍຄວາມກ້າວໜ້າ, ເຕັກນິກວິທະຍາສາດແລະອື່ນໆ. ໂອກາດນີ້, ທ່ານຈ່າງຈຸ່ນ, ຜູ້ຊ່ວຍລັດຖະມົນຕີການຕ່າງປະເທດຈີນໄດ້ສະເໜີຄວາມເຫັນຂອງຈີນຕໍ່ສະຖານະການເສດຖະກິດໂລກແລະຈຸດຢືນຂອງຕົນກ່ຽວກັບການຮ່ວມມືອາຊີປາຊີຟິກ, ທ່ານໄດ້ເນັ້ນຄວາມໝາຍສຳຄັນຕໍ່ການຍຶດໝັ້ນລັດທິຫຼາຍຝ່າຍພາຍໃຕ້ສະຖານະການໃນປັດຈຸບັນ, ທ່ານກ່າວຕື່ມວ່າຈີນຈະສືບຕໍ່ປະຕິບັດທັດສະນະຄະຕິທີ່ປຶກສາຫາລືກັນ, ການກໍ່ສ້າງຮ່ວມກັນແລະແບ່ງປັນຜົນປະໂຫຍດຮ່ວມກັນ, ຕັ້ງໜ້າດຳເນີນການຮ່ວມມືສາກົນ "ໜຶ່ງແລວໜຶ່ງເສັ້ນທາງ", ເສີມຂະຫຍາຍບົດບາດຂອງປະເທດໃຫຍ່ທີ່ມີຄວາມຮັບຜິດຊອບ, ແລະຊຸກຍູ້ການຮ່ວມມືລັດທິຫຼາຍຝ່າຍ.
 |
