ວັນທີ 15 ພຶດສະພານີ້, ສະຫະພາບເອີຣົບກັບປະເທດຝຣັ່ງ, ເຢຍລະມັນ ແລະອັງກິດໄດ້ຈັດການເຈລະຈາກັບອີຣານ ເຊິ່ງໄດ້ປະກາດແຜນການຮ່ວມມືທາງດ້ານເສດຖະກິດກັບອີຣານ ເພື່ອສືບຕໍ່ຮັກສາສັນຍາຮອບດ້ານບັນຫານິວເຄຼຍອີຣານຫຼັງຈາກອາເມລິກາຖອນອອກຈາກສັນຍາດັ່ງກ່າວ.
ທ່ານແຟເດີຣີຄາ ໂມເກຣີນີ ຜູ້ຕາງໜ້າລະດັບສູງນະໂຍບາຍທາງການທູດ ແລະຄວາມສະຫງົບສະຫະພາບເອີຣົບກ່າວວ່າ: ເພື່ອຣັກສາສັນຍານິວເຄຼຍອີຣານ ແລະຮັບປະກັນອີຣານສາມາດຮັບຜົນປະໂຫຍດທາງດ້ານເສດຖະກິດໃນການປະຕິບັດສັນຍາດັ່ງກ່າວ, ປັດຈຸບັນນີ້ຜູ້ຊ່ຽວຊານຈາກສະຫະພາບເອີຣົບ ແລະອີຣານກຳລັງປຶກສາຫາລືໃນ 9 ຫົວຂໍ້ຕົ້ນຕໍໃນການຮ່ວມມືທາງດ້ານເສດຖະກິດ, ລວມທັງການລົງເລິກສາຍພົວພັນເສດຖະກິດ-ການຄ້າກັບອີຣານ, ຮັບປະກັນການສົ່ງອອກນ້ຳມັນ ແລະອາຍແກັສທຳມະຊາດຂອງອີຣານ, ເພີ່ມທະວີການລົງທຶນຕໍ່ອີຣານ, ສົ່ງເສີມການຮ່ວມມືດ້ານການທະນາຄານກັບຕ່າງປະເທດຂອງອີຣານ ແລະອື່ນໆ, ຫວັງວ່າຈະສາມາດຊອກຫາວິທີແກ້ໄຂບັນຫາເຫຼົ່ານີ້ໄດ້ໃນອີກຫຼາຍອາທິດຂ້າງໜ້າ.
ນອກຈາກນີ້, ກອງປະຊຸມຄະນະກຳມະການຮ່ວມສັນຍານິວເຄຼຍອີຣານຈະຈັດຂຶ້ນຢູ່ນະຄອນຫຼວງວຽນປະເທດໂອຕຼິສໃນອາທິດໜ້າ. ທ່ານໂມເກນີຣີກ່າວຕື່ມວ່າ: ໃນເວລານັ້ນ, ສະຫະພາບເອີຣົບ ກັບປະເທດຝຣັ່ງ, ເຢຍລະມັນ ແລະອັງກິດຈະສົ່ງຮອງລັດຖະມົນຕີກະຊວງການຕ່າງປະເທດ ຫຼື ຜູ້ຕາງໜ້າເຂົ້າຮ່ວມກອງປະຊຸມດັ່ງກ່າວ ເພື່ອສືບຕໍ່ແລກປ່ຽນຄຳຄິດເຫັນກ່ຽວກັບການຮັກສາສັນຍານິວເຄຼຍອີຣານ.
 |
