ງານວາງສະແດງລາຍການຮູບເງົາແລະລະຄອນໂທລະພາບສາກົນຈີນຄັ້ງທີ 15 ໄດ້ໄຂຂຶ້ນຢູ່ຫໍວາງສະແດງປັກກິ່ງໃນວັນທີ 17 ພຶດສະພານີ້ ເຊິ່ງມີຜູ້ປະກອບການຈາກ 50 ກວ່າປະເທດແລະເຂດແຄວ້ນໄດ້ນຳເອົາລາຍການທີ່ມີເນື້ອໃນປະເພດຕ່າງໆຈຳນວນຫຼວງຫຼາຍມາຮ່ວມງານ.ສື່ມວນຊົນຕ່າງປະເທດແລະຜູ້ຊົມພາກັນສະແດງຄວາມສົນໃຈແລະຄວາມນິຍົມຊົມຊອບຕໍ່ຮູບເງົາແລະລະຄອນໂທລະພາບທີ່ມີວັດທະນະທຳຈີນ.
ງານວາງສະແດງຄັ້ງນີ້ມີສະຖານີວິທະຍຸໂທລະພາບສູນກາງຈີນເປັນເຈົ້າພາບຈັດຂຶ້ນແລະມີພາກສ່ວນທຸລະກິດທີ່ເຂົ້າຮ່ວມງານ ຫຼາຍກວ່າ 300 ແຫ່ງໄດ້ວາງສະແດງລາຍການ ລະຄອນໂທລະພາບ, ຮູບເງົາ,ຟີມສາລະຄະດີ, ກາຕູນ,ລາຍການໂທລະພາບແລະອື່ນໆທັງໝົດ 8 ໝື່ນເລື່ອງແລະຕອນ.
ເພື່ອສົ່ງເສີມວັດທະນະທຳຈີນຢູ່ຕ່າງປະເທດໃຫ້ໄດ້ຮັບປະສິດທິຜົນດີກວ່າເກົ່າ, ສູນການແປແລະພາກຮູບເງົາ,ລະຄອນໂທລະພາບດ້ວຍຫຼາຍພາສາຂອງສະຖານີວິທະຍຸໂທລະພາບສູນກາງຈີນໄດ້ເຊັນສັນຍາອອກອາກາດລາຍການລະຄອນຈີນກັບສື່ມວນຊົນທີ່ມີຊື່ສຽງຂອງ 30 ກວ່າປະເທດໃນອາຊີ,ອາຟຣິກກາ,ເອີຣົບ,ທະວີບອາເມລິກາແລະໂອຊຽນນີ. ຜ່ານຈາກ ລະຄອນຈີນ ເຊິ່ງເປັນຄໍລຳສະເພາະທີ່ອອກອາກາດເປັນປະຈຳ, ໂທລະພາບຂອງປະເທດກ່ຽວຂ້ອງຈະອອກອາກາດຮູບເງົາແລະລະຄອນໂທລະພາບດີເດັ່ນຂອງຈີນທີ່ພາກເປັນພາສາແມ່ຂອງປະເທດນັ້ນເປັນປະຈຳ.
