ທ່ານຫຼິວເຮີ້ ກຳມະການກົມການເມືອງສູນກາງພັກກອມມູນິດຈີນ, ຮອງນາຍົກລັດຖະມົນຕີຈີນ, ຜູ້ຊີ້ນຳໜ່ວຍງານຈີນໃນການສົນທະນາເສດຖະກິດຮອບດ້ານຈີນ-ອາເມລິກາ ທັງເປັນທູດພິເສດຂອງທ່ານສີຈິ້ນຜິງ ປະທານປະເທດຈີນ ພວມຢ້ຽມຢາມຢູ່ອາເມລິກາ ແລະໄດ້ພົບປະກັບທ່ານເຮນຣີ ກີຊິງເກີ ອະດີດລັດຖະມົນຕີກະຊວງການຕ່າງປະເທດອາເມລິກາ ແລະສະມາຊິກລັດຖະສະພາຫຼາຍທ່ານ ເຊັ່ນ ທ່ານອໍຣິນ ເຮດສ໌ ປະທານສະພາສູງຊົ່ວຄາວ, ປະທານກຳມາທິການການເງິນສະພາສູງ ແລະ ທ່ານເຄວິນ ເບຣດີ ປະທານກຳມາທິການລະດົມທຶນສະພາຕ່ຳອາເມລິກາ ຢູ່ນະຄອນຫຼວງວໍຊິງຕັນ ໃນວັນທີ 16 ພຶດສະພານີ້.
ໃນຂະນະທີ່ພົບປະກັບສະມາຊິກສຳຄັນຂອງສະພາສູງ ແລະ ສະພາຕ່ຳອາເມລິການັ້ນ, ທ່ານຫຼິວເຮີ ຊີ້ໃຫ້ເຫັນວ່າ: ຈີນແລະອາເມລິກາພັດທະນາການພົວພັນຮ່ວມມືທີ່ປອດໃສ ແລະ ໝັ້ນທ່ຽງເປັນເວລາຍາວນານ ໄດ້ສອດຄ່ອງກັບຜົນປະໂຫຍດພື້ນຖານຂອງປະຊາຊົນສອງຊາດ ແລະກໍເປັນການຄອງຄອຍຈາກປະຊາຄົມໂລກທົ່ວໄປ. ສອງຝ່າຍຄວນປະຕິບັດຕໍ່ບັນຫາຕ່າງໆໃນການພົວພັນເສດຖະກິດການຄ້າລະຫວ່າງສອງຝ່າຍຢ່າງຮອບດ້ານ ແລະພາວະວິໄສ ແລະແກ້ໄຂບັນຫາທີ່ກ່ຽວຂ້ອງໃຫ້ເໝາະສົມບົນພື້ນຖານຫຼັກການທີ່ເຄົາລົບນັບຖືເຊິ່ງກັນແລະກັນ, ສະເໝີພາບ ແລະຕ່າງຝ່າຍຕ່າງມີຜົນປະໂຫຍດ. ຈີນໃຫ້ຄວາມສຳຄັນຕໍ່ບົດບາດຂອງລັດຖະສະພາອາເມລິກາ ແລະຍິນດີເພີ່ມທະວີການແລກປ່ຽນກັບລັດຖະສະພາອາເມລິກາ.
ສະມາຊິກສະພາສູງ ແລະສະພາຕ່ຳອາເມລິກາ ຕ່າງກໍກ່າວວ່າ: ອາເມລິກາຍິນດີຮັກສາການພົວພັນທີ່ດີກັບຈີນ ແລະເຖິງວ່າ ປັດຈຸບັນ, ໃນຂົງເຂດເສດຖະກິດການຄ້າລະຫວ່າງສອງປະເທດມີບັນຫາກໍຕາມ ແຕ່ອາເມລິກາ ແລະຈີນກໍບໍ່ຄວນເຮັດສົງຄາມການຄ້າ ຫວັງວ່າສອງຝ່າຍຈະຕັ້ງໜ້າສະແຫວງຫາວິທີການແກ້ໄຂທີ່ສອດຄ່ອງກັບຜົນປະໂຫຍດຂອງສອງປະເທດ ໂດຍຜ່ານການຫາລືກັນ.
