ມີນັກຂ່າວຖາມໃນກອງປະຊຸມຖະແຫຼງຂ່າວ ວັນທີ 17 ພຶດສະພານີ້ວ່າ: ທ່ານເຣນ ພາວ ສະມາຊິກສະພາສູງອາເມລິກາ ໄດ້ໃຫ້ສຳພາດຕໍ່ນັກຂ່າວໃນເລື່ອງທີ່ ສປປ ເກົາຫຼີຖະແຫຼງວ່າອາດຈະພິຈາລະນາຕື່ມອີກກ່ຽວກັບການພົບປະກັນລະຫວ່າງຜູ້ນຳ ສປປ ເກົາຫຼີ-ອາເມລິກາ ໂດຍກ່າວວ່າ: ສປປ ເກົາຫຼີ ໄດ້ປ່ອຍຊາວອາເມລິກາ 3 ຄົນ ແລະປະກາດຈະຢຸດເຊົາການທົດລອງນິວເຄລຍ ແລະ ຂີປະນາວຸດ ເຊິ່ງເປັນການກະທຳທີ່ປະນີປະນອມຈາກ ສປປ ເກົາຫຼີ ແຕ່ພັດບໍ່ເຫັນອາເມລິກາມີການຕອບຮັບທີ່ມີຄວາມຄືບໜ້າແຕ່ຢ່າງໃດ. ຈີນມີຄວາມເຫັນແນວໃດຕໍ່ເລື່ອງນີ້?
ທ່ານລູ້ຄ່າງ ໂຄສົກກະຊວງການຕ່າງປະເທດຈີນ ຕອບວ່າ: ສປປ ເກົາຫຼີ ໄດ້ທຳຄວາມພະຍາຍາມຕ່າງໆທີ່ສຳຄັນ ລວມທັງປະກາດຢຸດເຊົາການທົດລອງນິວເຄລຍ, ປິດຖານທົດລອງນິວເຄລຍພຸງເກຣີ ແລະອື່ນໆ ເຊິ່ງໄດ້ສະແດງໃຫ້ເຫັນເຖິງເຈຕະນາທີ່ດີຂອງ ສປປ ເກົາຫຼີໃນການຊຸກຍູ້ການປອດນິວເຄລຍຢູ່ແຫຼມເກົາຫຼີ, ການສ້າງຄວາມໄວ້ເນື້ອເຊື່ອໃຈກັບບັນດາຝ່າຍທີ່ກ່ຽວຂ້ອງ ແລະ ຄວາມຈິງໃຈຂອງ ສປປ ເກົາຫຼີທີ່ສຸມໃສ່ຊຸກຍູ້ຂະບວນການແກ້ໄຂບັນຫາແຫຼມເກົາຫຼີໂດຍຜ່ານການເຈລະຈາທາງການເມືອງ ຈຶ່ງຖືວ່າເປັນທ່າທີທີ່ຕັ້ງໜ້າແລະໜ້າຢືນຢັນ ແລະຄວນໄດ້ຮັບການປຸກລະດົມ, ຍິນດີຕ້ອນຮັບ ແລະ ການສະໜັບສະໜູນຈາກປະຊາຄົມໂລກ ແລະກໍຄວນເປັນສິ່ງທີ່ຊຸກຍູ້ໃຫ້ຝ່າຍທີ່ກ່ຽວຂ້ອງປະຕິບັດໄປຕາມທິດທາງດຽວກັນ.
ທ່ານລູ້ຄ່າງ ຮຽກຮ້ອງໃຫ້ອາເມລິກາ ແລະ ສປປ ເກົາຫຼີ ກຳແໜ້ນໂອກາດໃນປັດຈຸບັນ ແລະ ສືບຕໍ່ສຸມໃສ່ການສ້າງຄວາມໄວ້ເນື້ອເຊື່ອໃຈກັນ, ດຳເນີນການເຈລະຈາກັນ ແລະຮ່ວມກັນພະຍາຍາມຢ່າງຕັ້ງໜ້າເພື່ອບັນລຸການປອດນິວເຄລຍຢູ່ແຫຼມເກົາຫຼີ ແລະ ຄວາມສະຫງົບຖາວອນຂອງພາກພື້ນ.
