ວັນທີ 17 ພຶດສະພານີ້, ທ່ານເຈມີ ແມັກໂກນດຣິກ ຜູ້ປະສານງານທາງມະນຸດສະທຳໃນເຂດດິນແດນປາແລັສຕິນທີ່ຖືກຍຶດຄອງ ອົງການສະຫະປະຊາຊາດ ຫຼື ສປຊ ໄດ້ຮຽກຮ້ອງບັນດາຝ່າຍໃຫ້ຄວາມຊ່ວຍເຫຼືອໂດຍດ່ວນແກ່ຜູ້ໄດ້ຮັບຜົນກະທົບຈາກເຫດການປະທະກັນດ້ວຍຄວາມຮຸນແຮງທີ່ເກີດຂຶ້ນຢູ່ເຂດກາຊາ.
ທ່ານແມັກໂກນດຣິກ ກ່າວຕື່ມວ່າ: ສະຖານະການຢູ່ເຂດກາຊາເຮັດໃຫ້ຂ້າພະເຈົ້າຮູ້ສຶກເສຍໃຈທີ່ສຸດ ແລະວິກິດການກໍຍັງໄກຫຼາຍທີ່ຈະສິ້ນສຸດລົງ. ຂະນະທີ່ຢາ ແລະເຄື່ອງຊ່ວຍເຫຼືອອື່ນໆໃນສາງກໍໃກ້ຈະໝົດແລ້ວ ແລະ ວຽກງານຊ່ວຍເຫຼືອຂອງອົງການສະຫະປະຊາຊາດພັດຖືກຈຳກັດຍ້ອນຂາດເງິນທຶນ, ໂດຍຕາມແຜນການຮັບມືດ້ານມະນຸດສະທຳເຂດກາຊາສົກປີ 2018 ຂອງ ສປຊ ນັ້ນ, ຈະຕ້ອງລະດົມທຶນໃຫ້ໄດ້ 400 ລ້ານໂດລາສະຫະລັດ ແຕ່ປັດຈຸບັນໄດ້ພຽງແຕ່ 16% ເທົ່ານັ້ນ.
