ວັນທີ 17 ພຶດສະພານີ້, ຢູ່ທຳນຽບຂາວ, ທ່ານໂດນັນ ທຣຳ ປະທານາທິບໍດີອາເມລິກາໄດ້ຕ້ອນຮັບການເຂົ້າຢ້ຽມຄຳນັບຂອງທ່ານຫຼິວເຮີ້ ທູດພິເສດທ່ານປະທານສີຈິ້ນຜິງ, ກຳມະການກົມການເມືອງສູນກາງພັກກອມມູນິດຈີນ, ຮອງນາຍົກລັດຖະມົນຕີຈີນ ທັງເປັນຜູ້ປະສານງານຝ່າຍຈີນໃນການສົນທະນາເສດຖະກິດຮອບດ້ານຈີນ-ອາເມລິກາ.
ໃນການຢ້ຽມຢາມຄັ້ງນີ້, ສອງຝ່າຍໄດ້ລົງເລິກແລກປ່ຽນຄວາມເຫັນກ່ຽວກັບການພົວພັນເສດຖະກິດການຄ້າຈີນ-ອາເມລິກາ. ທ່ານຫຼິວເຮີ້ກ່າວວ່າ, ການມາຢ້ຽມຢາມອາເມລິກາຂອງຂ້າພະເຈົ້າເທື່ອນີ້ແມ່ນອີງຕາມຄວາມເຫັນເປັນເອກະພາບກັນລະຫວ່າງປະມຸກລັດສອງປະເທດ ເພື່ອສືບຕໍ່ລົງເລິກແລກປ່ຽນຄວາມເຫັນກັບອາເມລິກາກ່ຽວກັບບັນຫາເສດຖະກິດການຄ້າຈີນ-ອາເມລິກາ. ຈີນຍິນດີພະຍາຍາມຮ່ວມກັບອາເມລິກາ, ຊຳລະແກ້ໄຂບັນຫາທາງເສດຖະກິດການຄ້າທີ່ສອງຝ່າຍສົນໃຈຮ່ວມກັນ ບົນພື້ນຖານສະເໝີພາບ ແລະ ຕ່າງຝ່າຍຕ່າງມີຜົນປະໂຫຍດ ເພື່ອຮັບປະກັນໃຫ້ການຮ່ວມມືທາງເສດຖະກິດການຄ້າລະຫວ່າງສອງຝ່າຍສືບຕໍ່ກາຍເປັນພື້ນຖານໜັກແໜ້ນ ແລະ ກຳລັງແຮງຊຸກຍູ້ການພົວພັນຈີນ-ອາເມລິກາ.
ທ່ານທຣຳກ່າວວ່າ, ການຮັກສາການພົວພັນທີ່ດີໃນການຮ່ວມມືເສດຖະກິດການຄ້າລະຫວ່າງສອງປະເທດອາເມລິກາ-ຈີນແມ່ນມີຄວາມສຳຄັນທີ່ສຸດ. ຫວັງໃຫ້ທີມງານເສດຖະກິດສອງປະເທດພະຍາຍາມຮ່ວມກັນ, ຕັ້ງໜ້າແກ້ໄຂບັນຫາທີ່ຄົງຄ້າງຢູ່ໃນການພົວພັນເສດຖະກິດການຄ້າລະຫວ່າງສອງປະເທດ. ອາເມລິກາ ແລະ ຈີນຄວນເພີ່ມທະວີການຮ່ວມມືໃນຂົງເຂດພະລັງງານ ແລະ ຂະແໜງການຜະລິດ ພ້ອມທັງເພີ່ມທະວີການຮ່ວມມືທາງການຄ້າ ແລະ ການລົງທຶນ, ເປີດກວ້າງການຄ້າຜະລິດຕະພັນກະສິກຳ ແລະ ການອະນຸຍາດເຂົ້າຕະຫຼາດ, ເພີ່ມທະວີການຮ່ວມມືປົກປ້ອງຊັບສິນທາງປັນຍາ ເພື່ອນຳເອົາຜົນປະໂຫຍດຕົວຈິງຫຼາຍກວ່າເກົ່າມາໃຫ້ປະຊາຊົນສອງຊາດ.
 |
