ກອງປະຊຸມອະນຸລັກສິ່ງແວດລ້ອມນິເວດທົ່ວປະເທດຈີນໄດ້ຈັດຂຶ້ນຢູ່ນະຄອນຫຼວງປັກກິ່ງແຕ່ວັນທີ 18 ຫາ 19 ພຶດສະພານີ້. ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ, ປະທານປະເທດທັງເປັນປະທານຄະນະກຳມະການການທະຫານສູນກາງຈີນໄດ້ເຂົ້າຮ່ວມກອງປະຊຸມ ແລະກ່າວສູນທອນພົດທີ່ສຳຄັນ ໂດຍກ່າວເນັ້ນວ່າ, ຕ້ອງມີສະຕິຕື່ນຕົວທີ່ປະສານສົມທົບການພັດທະນາເສດຖະກິດສັງຄົມກັບການສ້າງສາຄວາມສິວິໄລດ້ານນິເວດ, ເພີ່ມຄວາມແຮງໃນການຊຸກຍູ້ການສ້າງສາຄວາມສິວິໄລດ້ານນິເວດ. ແກ້ໄຂບັນຫາສິ່ງແວດລ້ອມນິເວດ, ເດັດດ່ຽວສຳເລັດໜ້າທີ່ປ້ອງກັນ ແລະບຳບັດມົນລະພິດ, ຊຸກຍູ້ໃຫ້ການສ້າງສາຄວາມສິວິໄລດ້ານນິເວດກ້າວຂຶ້ນສູ່ລະດັບໃໝ່.
ທ່ານສີຈິ້ນຜິງກ່າວເນັ້ນວ່າ, ການສ້າງສາຄວາມສິວິໄລດ້ານນິເວດເປັນແຜນລວມພື້ນຖານທີ່ພົວພັນເຖິງການພັດທະນາແບບຍືນຍົງຂອງປະຊາຊາດຈີນ. ເມື່ອສັງເກດໂດຍລວມແລ້ວເຫັນວ່າ, ຄຸນນະພາບສິ່ງແວດລ້ອມນິເວດຂອງຈີນໄດ້ດີຂຶ້ນຢ່າງຕໍ່ເນື່ອງ, ແຕ່ປະສິດທິຜົນຍັງບໍ່ໜັກແໜ້ນເທື່ອ. ການສ້າງສາຄວາມສິວິໄລດ້ານນິເວດພວມຢູ່ໃນໄລຍະຂໍກະແຈທີ່ຜະເຊີນກັບຄວາມກົດດັນຫຼາຍດ້ານ ແລະມີໜ້າທີ່ອັນໜັກໜາ. ຕ້ອງເລັ່ງລັດສ້າງສາລະບົບຄວາມສິວິໄລດ້ານນິເວດ, ເພື່ອຮັບປະກັນໃຫ້ຄຸນນະພາບສິ່ງແວດລ້ອມນິເວດມີການປ່ຽນແປງຢ່າງເຖິງຖອງ, ແລະບັນລຸເປົ້າໝາຍ ປະເທດຈີນທີ່ສວຍງາມ ໂດຍພື້ນຖານເມື່ອປີ2035. ຮອດກາງສະຕະວັດນີ້, ໄດ້ຍົກລະດັບຄວາມສິວິໄລດ້ານວັດຖຸ, ການເມືອງ, ຈິດໃຈ, ສັງຄົມ ແລະລະບົບນິເວດ ໃຫ້ສູງຂຶ້ນຢ່າງຮອບດ້ານ, ຮູບການພັດທະນາ ແລະແບບແຜນດຳລົງຊີວິດແບບສີຂຽວໄດ້ເປັນຮູບເປັນຮ່າງຂຶ້ນຢ່າງຮອບດ້ານ, ມະນຸດກັບທຳມະຊາດຢູ່ຮ່ວມກັນຢ່າງກົມກຽວກັນ, ລະບົບປົກຄອງ ແລະຄວາມສາມາດປົກຄອງຂອງລັດໃນຂົງເຂດສິ່ງແວດລ້ອມນິເວດຫັນເປັນແບບທັນສະໄໝຢ່າງຮອບດ້ານ, ແລະສ້າງປະເທດທີ່ສວຍງາມໃຫ້ສຳເລັດ.
ທ່ານສີຈິ້ນຜິງຊີ້ອອກວ່າ, ການຊຸກຍູ້ການພັດທະນາແບບສີຂຽວຢ່າງຮອບດ້ານ, ສິ່ງສຳຄັນແມ່ນການປັບປຸງໂຄງປະກອບເສດຖະກິດ ແລະໂຄງປະກອບພະລັງງານ, ປັບປຸງໂຄງຮ່າງພັດທະນາທີ່ດິນ ແລະຊັບພະຍາກອນທຳມະຊາດໃຫ້ດີຂຶ້ນ, ປັບປຸງໂຄງປະກອບອຸດສາຫະກຳໃນພາກພື້ນ ແລະຕາມລຸ່ມແມ່ນ້ຳໃຫ້ດີຂຶ້ນ, ບຳລຸງກໍ່ສ້າງອຸດສາຫະກຳທີ່ປະຢັດພະລັງງານ ແລະອະນຸລັກສິ່ງແວດລ້ອມ. ຕ້ອງຖືເອົາການແກ້ໄຂບັນຫາສິ່ງແວດລ້ອມທີ່ພົ້ນເດັ່ນເປັນວຽກບຸລິມະສິດໃນຂົງເຂດຊີວິດການເປັນຢູ່ຂອງປະຊາຊົນ. ຕ້ອງເດັດດ່ຽວເອົາຊະນະໃນບັ້ນປົກປ້ອງທ້ອງຟ້າທີ່ໂປ່ງໃສ, ລົງເລິກຈັດຕັ້ງປະຕິບັດແຜນການປ້ອງກັນ ແລະບຳບັດມົນລະພິດນ້ຳ, ຈັດຕັ້ງປະຕິບັດແຜນການປ້ອງກັນ ແລະບຳບັດມົນລະພິດທີ່ດິນຢ່າງຮອບດ້ານາ, ປັບປຸງສະພາບແວດລ້ອມທີ່ຢູ່ອາໄສເຂດຊົນນະບົດຢ່າງຕໍ່ເນື່ອງ, ສ້າງເຂດຊົນນະບົດທີ່ສວຍງາມ. ຕ້ອງປ້ອງກັນຄວາມສ່ຽງດ້ານສິ່ງແວດລ້ອມນິເວດຢ່າງມີປະສິດທິຜົນ, ສ້າງລະບົບປ້ອງກັນຄວາມສ່ຽງດ້ານສິ່ງແວດລ້ອມຕາມທຸກຂັ້ນຕອນແລະແບ່ງເປັນຫຼາຍລະດັບ. ຕ້ອງຍົກລະດັບການປັບປຸງສິ່ງແວດລ້ອມໃຫ້ສູງຂຶ້ນ, ນຳໃຊ້ພາຫະນະການຕະຫຼາດຢ່າງເຕັມສ່ວນ, ບູລະນະກົນໄກກຳນົດລາຄາຊັບພະຍາກອນ ແລະອະນຸລັກສິ່ງແວດລ້ອມໃຫ້ສົມບູນຂຶ້ນ, ເພີ່ມຄວາມພະຍາຍາມໃນການຄົ້ນຄວ້າ ວິທະຍາສາດເຕັກໂນໂລຊີກ່ຽວກັບໂຄງການທີ່ສຳຄັນ. ຕ້ອງ ຈັດຕັ້ງປະຕິບັດຍຸດທະສາດແຫ່ງຊາດໃນການຮັບມືກັບການປ່ຽນແປງຂອງດິນຟ້າອາກາດຢ່າງຕັ້ງໜ້າ, ຊຸກຍູ້ ແລະນຳພາການສ້າງລະບົບປັບປຸງການປ່ຽນແປງຂອງດິນຟ້າອາກາດທົ່ວໂລກທີ່ຍຸຕິທຳ ສົມເຫດສົມຜົນ ແລະຮ່ວມມືແບບຕ່າງຝ່າຍຕ່າງມີຜົນປະໂຫຍດ, ເພື່ອສະແດງໃຫ້ເຫັນບົດບາດຂອງປະເທດໃຫຍ່ທີ່ມີຄວາມຮັບຜິດຊອບ, ຮ່ວມກັນຍຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ.
