ຕາມຂ່າວ CRI: ວັນທີ 17-18 ພຶດສະພານີ້, ທ່ານຫຼິວເຮີ້ ທູດພິເສດຂອງທ່ານ ປະທານສີຈິ້ນຜິງ, ກຳມະການກົມການເມືອງສູນກາງພັກກອມມູນິດຈີນ, ຮອງນາຍົກລັດຖະມົນຕີ, ຫົວໜ້າຝ່າຍຈີນຂອງການເຈລະຈາເສດຖະກິດຮອບດ້ານລະຫວ່າງຈີນ-ອາເມລິກາພ້ອມດ້ວຍຄະນະໄດ້ປຶກສາຫາລືຢ່າງສ້າງສັນກ່ຽວກັບບັນຫາການຄ້າກັບຄະນະຜູ້ແທນອາເມລິກາທີ່ປະກອບດ້ວຍທ່ານ ສະຕີເວັນ ມູນູຊີນ ລັດຖະມົນຕີກະຊວງການເງິນອາເມລິກາ, ທ່ານວີວເບີ ໂຣສ, ລັດຖະມົນຕີກະຊວງການຄ້າອາເມລິກາ, ທ່ານໂຣເບີດ ໄລທທີເຈີ ຜູ້ຕາງໜ້າການຄ້າອາເມລິກາແລະຜູ້ອື່ນໆຢູ່ນະຄອນຫຼວງວໍຊິງຕັນສະຫະລັດອາເມລິກາ. ສື່ມວນຊົນອາເມລິກາໄດ້ເອົາໃຈໃສ່ຢ່າງສູງຕໍ່ເລື່ອງນີ້.
ສື່ມວນຊົນຫຼັກຂອງອາເມລິກາໄດ້ລາຍງານຂ່າວກ່ຽວກັບການປຶກສາຫາລືເສດຖະກິດການຄ້າລະຫວ່າງສອງປະເທດທີ່ໄດ້ອອກຖະແຫຼງການຮ່ວມໃນວັນທີ 19 ພຶດສະພານີ້. CNN ຂອງອາເມລິກາລາຍງານວ່າ, ໂດຍຜ່ານສະຖານະການເຄັ່ງຕຶງທີ່ດຳເນີນເປັນໄລຍະຫຼາຍອາທິດ, ສອງປະເທດໄດ້ບັນລຸສັນຍາການຄ້າເບື້ອງຕົ້ນ. ເວັບໄຊຂອງໜັງສືພິມ "ນິວຢອກທາມສ໌" ລາຍງານວ່າ, ໄລຍະນີ້ອາເມລິກາແລະຈີນລ້ວນແຕ່ຜ່ອນສັ້ນຜ່ອນຍາວເພື່ອຜ່ອນຄາຍສະຖານະການເຄັ່ງຕຶງດ້ານການຄ້າ, ສອງປະເທດລ້ວນແຕ່ກ່າວວ່າການປຶກສາຫາລືການຄ້າໄດ້ຮັບຜົນສຳເລັດ, ສ່ວນລາຍລະອຽດຕ່າງໆຕ້ອງໄດ້ປຶກສາຫາລືຕື່ມອີກ.CNBC ເຊິ່ງເປັນສື່ມວນຊົນເສດຖະກິດການເງິນອາເມລິກາລາຍງານໃນວັນທີ 19 ພຶດສະພານີ້ວ່າ, ຍ້ອນເປັນຫ່ວງວ່າສົງຄາມການຄ້າໂລກແລະສະຖານະການຮຸນແຮງລະຫວ່າງສອງກຸ່ມເສດຖະກິດໃຫຍ່ຂອງໂລກເຄັ່ງຕຶງຂຶ້ນຕື່ມອີກ, ຈີນແລະອາເມລິກາຈຶ່ງໄດ້ເພີ່ມທະວີການຮ່ວມມືດ້ວຍການປຶກສາຫາລືສອງຝ່າຍ.
 |
