ວັນທີ 21 ພຶດສະພານີ້ ຢູ່ນະຄອນຫຼວງປັກກິ່ງ, ທ່ານຈ້າວເຄີ້ຈື້ ທີ່ປຶກສາແຫ່ງລັດ, ລັດຖະມົນຕີກະຊວງປ້ອງກັນຄວາມສະຫງົບຈີນ ໄດ້ພົບປະກັບທ່ານດາເມຍ ຊາກິນບາເຢຟ ເລຂາທິການໃຫຍ່ສະພາຄວາມໝັ້ນຄົງແຫ່ງຊາດກຽກກິສະຖານ, ທ່ານວິກຕໍ ມັກມູດົຟ ເລຂາທິການໃຫຍ່ສະພາຄວາມໝັ້ນຄົງແຫ່ງຊາດອຸສເບກິສະຖານ, ທ່ານກາຮາຣົຟ ເລຂາທິການໃຫຍ່ສະພາຄວາມໝັ້ນຄົງແຫ່ງຊາດຕາຈີກີສະຖານ, ທ່ານນູເລນ ເຢີເມັກບາເຢຟ ຜູ້ຊ່ວຍປະທານາທິບໍດີ ທັງເປັນເລຂາທິການໃຫຍ່ສະພາຄວາມໝັ້ນຄົງແຫ່ງຊາດກາຊັກສະຖານ, ທ່ານນາເຊຍ ຄັນ ເຈນຈົວ ທີ່ປຶກສາຄວາມໝັ້ນຄົງແຫ່ງຊາດຂອງນາຍົກລັດຖະມົນຕີປາກິສຖານ ແລະ ທ່ານຣາຈິນເດີ ຄານາ ຮອງທີ່ປຶກສາຄວາມໝັ້ນຄົງແຫ່ງຊາດອິນເດຍ ໂອກາດເດີນທາງໄປຈີນເພື່ອເຂົ້າຮ່ວມກອງປະຊຸມເລຂາທິການໃຫຍ່ສະພາຄວາມໝັ້ນຄົງແຫ່ງຊາດອົງການຮ່ວມມືຊຽງໄຮຄັ້ວທີ 13.
ທ່ານຈ້າວເຄີ້ຈື້ ກ່າວວ່າ: ກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 ແລະ ກອງປະຊຸມ "ສອງສະພາ" ຂອງຈີນ ໄດ້ກຳນົດເອົາແນວຄິດສີຈິ້ນຜິງກ່ຽວກັບສັງຄົມນິຍົມທີ່ມີສີສັນພິເສດຂອງຈີນໃນຍຸກໃໝ່ ເປັນແນວຄິດຊີ້ນຳທີ່ຍຶດໝັ້ນໃນໄລຍະຍາວນານ ໄດ້ວາດມະໂນພາບໃໝ່ການພັດທະນາຂອງຈີນ ແລະກໍໄດ້ທຸ່ມເທພະລັງຊຸກດັນໃໝ່ເພື່ອພັດທະນາການພົວພັນລະຫວ່າງປະເທດສະມາຊິກອົງການຮ່ວມມືຊຽງໄຮ. ຈີນຈະຍຶດໝັ້ນທັດສະນະຂອງທ່ານປະທານສີຈິ້ນຜິງ ກ່ຽວກັບການສ້າງການພົວພັນສາກົນແບບໃໝ່ ແລະການສ້າງປະຊາຄົມຮ່ວມຊາຕາກຳມວນມະນຸດ ລົງເລິກການຮ່ວມມືທີ່ແທ້ຈິງກັບບັນດາປະເທດສະມາຊິກໃນຂົງເຂດຕ່າງໆ ລວມທັງຂົງເຂດການປະຕິບັດກົດໝາຍ ແລະຄວາມໝັ້ນຄົງ ພະຍາຍາມເຮັດວຽກງານກະກຽມຕ່າງໆໃຫ້ແກ່ກອງປະຊຸມສຸດຍອດອົງການຮ່ວມມືຊຽງໄຮທີ່ຊິ່ງຕາວ ແລະຊຸກຍູ້ອົງການຮ່ວມມືຊຽງໄຮໃຫ້ພັດທະນາຢ່າງບໍ່ຢຸດຢັ້ງ.
