ຕອນເຊົ້າວັນທີ 21 ພຶດສະພານີ້ ຢູ່ນະຄອນຫຼວງປັກກິ່ງ, ທ່ານ ລິວເຮີ້ ກຳມະການກົມການເມືອງສູນກາງພັກກອມມູນິດຈີນ, ຮອງນາຍົກລັດຖະມົນຕີຈີນ ໄດ້ພົບປະກັບຜູ້ຕາງໜ້າຕົ້ນຕໍຂອງອາເມລິກາຄືທ່ານ ບິວ ວອກເກີ ເຈົ້າຄອງລັດອາລັດສະກາ, ທ່ານ ຈອນ ຊັງເຊັສ ຮອງເຈົ້າຄອງລັດນິວແມັກຊິກໂກ ແລະທ່ານອື່ນໆ ທີ່ມາເຂົ້າຮ່ວມເວທີປຶກສາຫາລືເຈົ້າແຂວງຈີນ-ເຈົ້າຄອງລັດອາເມລິກາຄັ້ງທີ 4 ທີ່ຈັດຂຶ້ນຢູ່ຈີນ.
ໂອກາດດັ່ງກ່າວ, ທ່ານ ລິວເຮີ້ ກ່າວວ່າ, ຂ້າພະເຈົ້າຫາກໍກັບມາຈາກວໍຊິງຕັນ ແລະມາຮອດປັກກິ່ງ, ເທື່ອນີ້ ສອງຝ່າຍຈີນແລະອາເມລິກາໄດ້ດຳເນີນການເຈລະຈາທີ່ຕັ້ງໜ້າ, ແທດເໝາະກັບຕົວຈິງ ແລະບັງເກີດຜົນຢ່າງ ຫຼວງຫຼາຍກ່ຽວກັບບັນຫາເສດຖະກິດການຄ້າ ແລະໄດ້ຮັບຄວາມເປັນເອກະພາບກັນທີ່ສຳຄັນຈຳນວນໜຶ່ງ, ທັງນີ້ສອດຄ່ອງກັບຜົນປະໂຫຍດຂອງປະຊາຊົນສອງຊາດ ກໍຄືຂອງໂລກ. ເວທີປຶກສາຫາລືເຈົ້າແຂວງຈີນ-ເຈົ້າຄອງລັດອາເມລິກາ ແມ່ນກົນໄກແລກປ່ຽນທີ່ສຳຄັນລະຫວ່າງທ້ອງຖິ່ນສອງປະເທດ, ຫວັງວ່າ ສອງຝ່າຍຈະຖືເວທີປຶກສາຫາລືຄັ້ງນີ້ເປັນໂອກາດ, ຊຸກຍູ້ການຮ່ວມມືທີ່ແທດເໝາະກັບຕົວຈິງໃນຫຼາຍຂົງເຂດຈາກລະດັບທ້ອງຖິ່ນ ເພື່ອຊຸກຍູ້ສາຍພົວພັນສອງປະເທດໃຫ້ພັດທະນາກ້າວໄປໜ້າຢ່າງໜັກແໜ້ນແລະປອດໃສ.
ທ່ານ ວອກເກີ ແລະ ທ່ານ ຊັນເຊັສ ກ່າວວ່າ, ທົ່ວໂລກລ້ວນແຕ່ກຳລັງສະຫຼອງທີ່ອາເມລິກາແລະຈີນໄດ້ບັນລຸຄວາມເປັນເອກະພາບກັນກ່ຽວກັບບັນຫາເສດຖະກິດການຄ້າ. ອາເມລິກາຍິນດີເພີ່ມທະວີການຮ່ວມມືກັບທ້ອງຖິ່ນຕ່າງໆຂອງຈີນໃນຂົງເຂດການຄ້າ, ການລົງທຶນ, ການພັດທະນາແບບສີຂຽວ, ການແລກປ່ຽນວັດທະນະທຳ ແລະອື່ນໆຕື່ມອີກ, ຈະປະກອບສ່ວນຢ່າງຕັ້ງໜ້າເພື່ອຊຸກຍູ້ການພັດທະນາສາຍພົວພັນສອງປະເທດໃຫ້ດີຂຶ້ນກວ່າເກົ່າ.
 |
