ຕອນເຊົ້າວັນທີ 22 ພຶດສະພານີ້, ປະຊາຊົນໄທເກືອບພັນຄົນ ໄດ້ເຕົ້າໂຮມກັນຢູ່ມະຫາວິທະຍາໄລທຳມະສາດບາງກອກ ເພື່ອສະແດງຄວາມບໍ່ພໍໃຈຕໍ່ລັດຖະບານໄທທີ່ເລື່ອນເວລາດຳເນີນການເລືອກຕັ້ງ ແລະຮຽກຮ້ອງໃຫ້ລັດຖະບານເລີ່ມດຳເນີນການເລືອກຕັ້ງທົ່ວໄປພາຍໃນປີນີ້.
ວັນທີ 22 ພຶດສະພາເປັນວັນລະນຶກຄົບຮອບ 4 ປີຂອງເຫດການເຈົ້າໜ້າທີ່ທະຫານໄທກໍ່ການລັດຖະປະຫານ ແລະໂຄ່ນລົ້ມລັດຖະບານຍິ່ງລັກ. ການຊຸມນຸມເທື່ອນີ້ແມ່ນຈັດຂຶ້ນໂດຍກຸ່ມ "ຄົນຢາກເລືອກຕັ້ງ" ເຊິ່ງເປັນກຸ່ມສະໜັບສະໜູນດຳເນີນການເລືອກຕັ້ງທົ່ວໄປ ແລະໄດ້ວາງແຜນຈະເດີນຂະບວນອອກຈາກມະຫາວິທະຍາໄລທຳມະສາດໃນຕອນເຊົ້າວັນທີ 22 ພຶດສະພານີ້ ເພື່ອມຸ່ງໜ້າສູ່ສຳນັກງານນາຍົກລັດຖະມົນຕີ.
ສື່ມວນຊົນໄທລາຍງານວ່າ ມີຜູ້ເຂົ້າຮ່ວມການປະທ້ວງເກືອບ 100 ຄົນໄດ້ໄປນອນພັກຢູ່ມະຫາວິທະຍາໄລທຳມມະສາດໃນຕອນຄ່ຳວັນທີ 21 ເດືອນດຽວກັນ ແລະຕອນຮຸ່ງເຊົ້າມື້ຕໍ່ມາ, ຜູ້ປະທ້ວງໄດ້ເພີ່ມຂຶ້ນເປັນເກືອບໜຶ່ງພັນຄົນ. ຕໍ່ມາ, ເຈົ້າໜ້າທີ່ຕຳຫຼວດໄດ້ປິດຖະໜົນສູ່ສຳນັກງານນາຍົກລັດຖະມົນຕີ ແລະ ເພີ່ມກຳລັງຕຳຫຼວດປ້ອງກັນຢູ່ຕາມບໍລິເວນສຳນັກງານນາຍົກ ແລະໃນທີ່ສຸດ ຜູ້ປະທ້ວງກໍບໍ່ສາມາດເດີນຂະບວນອອກຈາກມະຫາວິທະຍາໄລທຳມະສາດໄດ້.
