ວັນທີ 22 ພຶດສະພານີ້, ທ່ານມ໊າຈ່າວຊີ້ວ໌ ຜູ້ຕາງໜ້າຖາວອນຂອງຈີນປະຈຳອົງການສະຫະປະຊາຊາດ ໄດ້ກ່າວປາໄສໃນກອງປະຊຸມອະພິປາຍຢ່າງເປີດເຜີຍກ່ຽວກັບການປ້ອງກັນປວງຊົນໃນການປະທະກັນດ້ວຍກຳລັງອາວຸດສະພາຄວາມໝັ້ນຄົງອົງການສະຫະປະຊາຊາດ ໂດຍເນັ້ນວ່າ ຄວນຄິດຫາວິທີຕ່າງໆເພື່ອປ້ອງກັນບໍ່ໃຫ້ເກີດການປະທະກັນດ້ວຍກຳລັງອາວຸດ ເພື່ອແກ້ໄຂບັນຫາການປ້ອງກັນປວງຊົນຈາກກົກຮາກ.
ທ່ານມ໊າຈ່າວຊີ້ວ໌ ກ່າວວ່າ: ລັດຖະບານປະເທດຄູ່ກໍລະນີ ແລະບັນດາຝ່າຍທີ່ປະທະກັນຄວນແບກຫາບໜ້າທີ່ຮັບຜິດຊອບການປ້ອງກັນປວງຊົນ ຕໍ່ການກະທຳຕ່າງໆທີ່ຝືນກັບກົດໝາຍວ່າດ້ວຍມະນຸດສະທຳສາກົນ ເຊັ່ນ ຂົ່ມຂູ່ ຫຼື ໂຈມຕີປວງຊົນ ໃນການປະທະກັນດ້ວຍກຳລັງອາວຸດນັ້ນ, ປະເທດຄູ່ກໍລະນີ ຄວນສືບສວນ-ສອບສວນ ແລະ ລົງໂທດຕາມກົດໝາຍ. ນອກນີ້, ການເຄື່ອນໄຫວເພື່ອຊ່ວຍເຫຼືອທາງມະນຸດສະທຳກໍຄວນຍຶດໝັ້ນວາງຕົວໃຫ້ເປັນກາງ, ພາວະວິໄສ ແລະທ່ຽງທຳ ພ້ອມທັງເຄົາລົບສິດອະທະປະໄຕ ແລະຜືນແຜ່ນດິນອັນຄົບຖ້ວນຂອງປະເທດຄູ່ກໍລະນີຢ່າງເຕັມທີ່, ເນັ້ນໜັກຄວາມເປັນມະນຸດສະທຳ ແລະຈິດໃຈທາງວິຊາສະເພາະຢ່າງພົ້ນເດັ່ນ ເພື່ອໄດ້ຄວາມເຂົ້າໃຈ ແລະຄວາມໄວ້ເນື້ອເຊື່ອໃຈຈາກບັນດາຝ່າຍທີ່ກ່ຽວຂ້ອງ ແລະຫຼີກລ່ຽງການຖະຫຼຳເຂົ້າການປະທະກັນ.
