ວັນທີ 21 ພຶດສະພານີ້, ທ່ານ ຫຼີເຄີ້ສຽງ ກຳມະການປະຈຳກົມການເມືອງສູນກາງພັກກອມມູນິດຈີນ, ນາຍົກລັດຖະມົນຕີຈີນ ໄດ້ລົງຢ້ຽມຢາມແລະເປັນປະທານຈັດກອງປະຊຸມສົນທະນາຢູ່ກະຊວງການຄ້າແລະອົງການພາສີກ່ຽວກັບການເປີດປະຕູສູ່ພາຍນອກໃຫ້ກວ້າງອອກຕື່ມອີກ.
ທ່ານ ຫຼີເຄີ້ສຽງ ກ່າວໃນກອງປະຊຸມສົນທະນາວ່າ, ໃນຮອບ 40 ປີຜ່ານມາ, ການເປີດປະຕູສູ່ໂລກພາຍນອກຂອງຈີນ ໄດ້ຊັກນຳການປະຕິຮູບ ແລະຊຸກຍູ້ການພັດທະນາ. ໃນສະໄໝປະຫວັດສາດໃໝ່, ການເປີດປະຕູໃຫ້ກວ້າງອອກຕື່ມອີກ ແມ່ນຍຸດທະສາດທີ່ພວກເຮົາຕ້ອງຄັດເລືອກຢ່າງແນ່ນອນ. ສ່ວນການລົງເລິກການປະຕິຮູບຕ່າງໆ, ກະຕຸກພະລັງຊີວິດຂອງຕະຫຼາດ, ປັບປຸງສະພາບແວດລ້ອມການພັດທະນາ ແລະຊຸກຍູ້ການພັດທະນາທີ່ມີຄຸນນະພາບສູງນັ້ນ ລ້ວນແຕ່ຕ້ອງຊັກນຳໂດຍການເປີດປະຕູສູ່ພາຍນອກໃນລະດັບສູງກວ່າເກົ່າ.
ທ່ານ ຫຼີເຄີ້ສຽງ ຍັງຊີ້ໃຫ້ເຫັນວ່າ, ຕ້ອງມີຄວາມເດັດດ່ຽວໃນການປົກປັກຮັກສາລະບົບການຄ້າຫຼາຍຝ່າຍ, ຊຸກຍູ້ໃຫ້ບັນດາປະເທດຫຼາຍກວ່າເກົ່າຮ່ວມກັບພວກເຮົາໃນການຍົກສູງລະດັບຄວາມເສລີດ້ານການຄ້າແລະຄວາມສະດວກດ້ານການລົງທຶນ, ປ້ອງກັນແລະແກ້ໄຂຄວາມສ່ຽງຢ່າງບັງເກີດຜົນ, ບັນລຸການພັດທະນາແບບຕ່າງຝ່າຍຕ່າງມີຜົນປະໂຫຍດໃນຂະບວນການເປີດປະຕູແລະແຂ່ງຂັນທາງບວກເຊິ່ງກັນແລະກັນ.
 |
